საქართველოს პრეზიდენტი გიორგი მარგველაშვილი მიიჩნევს, რომ პროკურატურაში დაწყებული რეფორმების სრულყოფილად განხორციელება, უმნიშვნელოვანესი პროცესია ადამიანის უფლებათა დაცვის კუთხით.
"პროკურატურის სისტემის რეფორმირება დღეს წარმოადგენს უმნიშვნელოვანეს საჭიროებას ჩვენი სახელმწიფოებრივობის განვითარებისთვის და სახელმწიფოებრივობის განვითარების თანმდევად ადამიანის უფლებათა დაცვის კუთხით და როგოც სახალხო დამცველის მოხსენებაში ვხედავთ, ერთ-ერთი მთავარი თემა, რომელიც არის წინ წამოწეული, ეს არის პროკურატურის მიერ, თუნდაც სამართალდამცავთა მიერ ჩადენილი ძალადობრივი ქმედების ან ქმედებათა შესაძლო გადამეტების მიმართ რეაგირების ეფექტურობა, რომელიც ჩემი აზრით, დაკავშირებულია თავად პროკურატურის რეფორმირების საკითხთან. ნამდვილად განსახორციელებელია რეფორმა ამ მიმართულებით”, - განაცხადა პრეზიდენტმა სასტუმრო "ქორთიარდ მარიოტში" სახალხო დამცველის აპარატის მიერ ორგანიზებულ ადამიანის უფლებათა დაცვის საკითხებზე გამართულ დებატებზე.
მარგველაშვილი სიტყვით გამოსვლაში სასამართლო სფეროში რეფორმების საჭიროებასაც შეეხო. მისი თქმით, ორ თვეზე უფრო დიდი ხნით ადამიანების წინასწარ პატიმრობაში ყოფნის ტენდენცია სახელმწიფოს მხრიდან ყურადღების მიქცევას საჭიროებს.
მარგველაშვილის თქმით, ადამიანის უფლებათა დაცვის სფეროში პრაქტიკული საქმიანობის მიმართ შეფასება უნდა ხდებოდეს არა წარსულთან შედარებით, არამედ იმ იდეალთან მიმართებით, რომელიც სახელმწიფოს არსობრივ ფუნქციონირებას განაპირობებს.
