7 ნოემბრისა და ,,ტელეიმედში” შეჭრის საქმე არსებით განხილვაზე გადადის. საქმეზე ბრალდებულებს მიხეილ სააკაშვილს, ზურაბ ადეიშვილს, გიგი უგულავას, დავით კეზერაშვილსა და ვანო მერაბიშვილს ბრალად სამსახურებრივი უფლებამოსილების გადამეტება ედებათ. მოსამართლემ არ დააკმაყოფილა დაცვის მხარის შუამდგომლობა მათ მიმართ, სისხლის სამართლებრივი დევნის შეწყვეტის შესახებ.
პროკურორ ჯარჯი წიკლაურის თქმით, საქმეზე წარმოდგენილია მყარი მტკიცებულებები, რომელთა ერთობლივი ანალიზით დადასტურდება ბრალდებულთა დანაშაული.
მისი თქმით, ამას კიდევ ერთხელ ცხადყოფს სასამართლოს დღევანდელი გადაწყვეტილება.
ექსპრეზიდენტ მიხეილ სააკაშვილის ადვოკატი ოთარ კახიძე კი პროკურატურასა და სასამართლოს ურთიერთშეთანხმებაში ადანაშაულებს.
,,მოსამართლე ვახტანგ მრელაშვილმა პროკურორის საუბრისას არანაირი ჩანაწერი არ გააკეთა თავისთვის, მაგრამ მომენტალურად, როგორც კი პროკურორმა გამოსვლა დაასრულა, წინასწარ გამზადებული განჩინება წაგვიკითხა. მასში ეწერა, რომ ბრალდების მხარემ დააზუსტა კვალიფიკაციასთან დაკავშირებული საკითხები. როგორც ჩანს, მოსამართლეს გული უგრძნობდა, რომ ბრალდება რაღაც საკითხებს დააზუსტებდა. ამ ყველაფერმა სრულიად კომიკური სახე მიიღო. არც კი ნიღბავენ იმას, რომ აბსოლუტურად შეთანხმებულად მოქმედებს სასამართლო და პროკურატურა", - განაცხადა ადვოკატმა.
აღნიშნულ საქმეში გაერთიანებულია 7 ნოემბრის აქციის დაშლის, "ტელეიმედში" შეჭრის, ასევე რუსთავის მეტალურგიული ქარხნის და მთაწმინდის პარკის პატარკაციშვილების ოჯახისთვის ჩამორთმევის ეპიზოდები. საქმის არსებითი განხილვა 12 ივნისს დაიწყება.