ელექტროენერგიის ტარიფის გაზრდის საკითხს მარეგულირებელი კომისია სექტემბერში, სრულიად დამოუკიდებლად გადაწყვეტს. ამის შესახებ, საქართველოს ენერგეტიკის მინისტრმა კახა კალაძემ ტელეკომპანია "იმედის" ეთერში განაცხადა.
მისი თქმით, ტარიფის ზრდასთან დაკავშირებით, მთავრობა მხოლოდ სუბსიდირების საკითხზე მსჯელობს.
"კომპანიებმა შეიტანეს განაცხადი მარეგულირებელ კომისიაში. მარეგულირებელი კომისია არის სრულიად დამოუკიდებელი ორგანო და ის ვალდებულია დათვალოს, შეუქმნა თუ არა რაიმე პრობლემა ლარის დევალვაციამ კომპანიებს. შესაბამისად, მას 10 სექტემბრამდე აქვს ვადა მოახდინოს ტარიფის გადათვლა. თუ იქნება ტარიფის მომატებაზე საუბარი, ეს ყველასთვის იქნება ცნობილი. მთავრობამ შემდეგ უნდა იმსჯელოს, ისევ სუბსირიებას მოახდენს, თუ მოხდება მოსახლეობისთვის და კომერციული სუბიექტებისთვის ტარიფის მომატება",- განაცხადა მინისტრმა.
მისივე თქმით, თვითონ სუბსიდირების მომხრე არ არის, რადგან მიაჩნია, რომ გარკვეული ეტაპის შემდეგ, ეს ხარჯი მძიმედ დააწვება ბიუჯეტს.
კახა კალაძის ინფორმაციით, ელექტროენერგიის სუბსიდირებისთვის ბიუჯეტიდან, ყოველწლიურად 15 მილიონის გამოყოფა ხდება.
