ლიეტუვამ ფილიპ კირკოროვს, ყირიმის ანექსიის საჯაროდ მხარდაჭერის გამო, ქვეყანაში შესვლა 5 წლით აუკრძალა
საქართველო, თბილისი - 2021-01-19 20:20:00
რუსი მომღერალი ფილიპ კირკოროვი ლიეტუვაში 5 წლის განმავლობაში შესვლას ვეღარ შეძლებს.
ლიეტუვის შინაგან საქმეთა სამინისტროს ინფორმაციით, მიგრაციის დეპარტამენტმა საგარეო საქმეთა სამინისტროს თხოვნით, მომღერალი კირკოროვი დაამატა იმ ადამიანთა სიაში, რომელთაც ლიეტუვაში შესვლა ეკრძალებათ.
ქვეყანაში შესვლის აკრძალვა ძალაში 19 იანვრიდან შედის.
"ყირიმის ანექსიის საჯაროდ მხარდაჭერა - ეს არის საკითხი, რომლის მიმართ ტოლერანტულებიც არ უნდა იყვნენ არცერთ დემოკრატიულ სახელმწიფოში. ჩვენ ერთმნიშვნელოვანი პოზიცია გვაქვს ასეთი საკითხების მიმართ, შესაბამისად, ეჭვგარეშე იყო, რომ კირკოროვი ლიეტუვაში არასასურველ პირთა სიაში მოექცეოდა", - განაცხადა ლიეტუვის შინაგან საქმეთა მინისტრმა.
ლიეტუვის საგარეო საქმეთა სამინისტრომ მოითხოვა კირკოროვის დამატება იმ ადამიანთა სიაში, ვისაც ლიეტუვაში შესვლა ეკრძალებათ, რადგან "ცნობილმა მომღერალმა ყირიმში განმეორებითი ვიზიტით განზრახ შელახა უკრაინის ტერიტორიული მთლიანობა და სუვერენიტეტი და ამ გზით უკანონოდ გაამართლა რუსეთის ფედერაციის აგრესიული ქმედებები".
საგარეო საქმეთა მინისტრის განცხადებით, კირკოროვის მონაწილოება ყირიმში გამართულ ღონისძიებებში "მნიშვნელოვნად აზიანებს ლიეტუვის ეროვნულ უსაფრთხოებას".