აფთიაქებში მედიკამენტებზე კონტროლი გამკაცრებულია, თუმცა დარღვევები მაინც ფიქსირდება
საქართველო, თბილისი - 2014-02-13 19:02:00
არასამთავრობო ორგანიზაცია „ადამიანი, კანონი, თავისუფლების" წევრები სამედიცინო საქმიანობის სახელმწიფო რეგულირების სააგენტოს, ფარმაცევტული კონტროლის დეპარტამენტის უფროსის მოადგილეს, დავით მაჭარაშვილს შეხვდნენ. შეხვედრა გაიმართა იმ ინფორმაციის საფუძველზე, რომ ავტორიზებულ (ფსიქოტროპულ) აფთიაქებში კვლავ გრძელდება სპეციალურ კონტროლს დაქვემდებარებული სამკურნალო საშუალებების ურეცეპტოდ გაცემა.შეხვედრის მთავარ განსახილველ საკითხს სწორედ ნარკოტიკული თრობის გამომწვევ მედიკამენტების გაყიდვაზე კონტროლის მექანიზმის გამკაცრება წარმოადგენდა. ორგანიზაციის წევრები, „სამედიცინო საქმიანობის სახელმწიფო რეგულირების სააგენტოს" მუშაობის ეფექტურობით დაინტერესდნენ, კერძოდ თუ რა მდგომარეობაა ავტორიზებული (ფსიქოტროპული) აფთიაქების კონტროლის მხრივ; კანონში შეტანილი ცვლილებების შემდეგ, რომელიც გულისხმობდა მინისტრის ბრძანება N 22ნ-ში ცვლილებების განხორციელებას, კერძოდ ექვსი ნივითიერება დაემატა 22 იანვრით გათვალისწინებულ ნუსხას. აღნიშნული ნივთიერებები ბრძანების ძალაში შესვლის შემდეგ მოქმედი კანონმდებლობით, არსებული ფარმაცევტული პროდუქციის მეორე ჯგუფიდან გადავიდა პირველ ჯგუფში, რაც გულისხმობს აღნიშნულ მედიკამენტებზე სპეციალური კონტროლის დაწესებას. ახალი რეგულაციით ექვსი საერთაშორისო დასახელების ფსიქოტროპული ნივთიერება: ბაკლოფენი (ბაკლოსანი), გაბაპენტინი (გრიმოდინი), დექსტრომეტროფინი (მაგიტუსი), ზობიკლონი (სომნოლი), ზალეპლონი (ანდანტე), ტრიპიკამინი, აფთიაქებში მხოლოდ სერტიფიცირებული ექიმის დანიშნულების საფუძველზე გაიცემა.
დავით მაჭარაშვილის განცხადებით საკანონმდებლო ცვლილების შემდეგ, ნარკოტიკული თრობის გამომწვევი პრეპარატების უკანონოდ გაყიდვის რამდენიმე შემთხვევაა დაფიქსირებული. მისი თქმით ყველა ეს აფთიაქი კანონის შესაბამისად დაჯარიმდა. სამედიცინო საქმიანობის სახელმწიფო რეგულირების სააგენტო მჭიდროდ თანამშრომლობს საქართველოს შინაგან საქმეთა სამინისტროსთან და აფთიაქების მონიტორინგს სისტემატიურად ანხორციელებს. დეპარტამენტი აქტიურად აგრძელებს მუშაობას რიგ საკანონმდებლო ცვლილებებზე, რომელიც გაცილებით გაადვილებს იმ მედიკამენტებზე კონტროლს, რომელთა დიდი რაოდენობით, არათერაპიული დოზით მიღების საფუძველზე მიიღწევა ნარკოტიკული თრობა.
სამედიცინო საქმიანობის სახელმწიფო რეგულირების სააგენტო და არასამთავრობო ორგანიზაცია „ადამინი, კანონი, თავისუფლება" განაგრძობს ზემოაღნიშნულ საკითხებთან დაკავშირებით ურთიერთთანამშრომლობის ფორმატში საქმიანობას.