Air France-მა და Finnair-მა ბელარუსის საჰაერო სივრცეში ფრენები შეაჩერეს
საქართველო, თბილისი - 2021-05-25 11:33:00
ფრანგულმა ავიაკომპანია Air France-მა და ფინურმა ავიაკომპანია Finnair-მა ბელარუსის საჰაერო სივრცეში ფრენები შეაჩერეს.
24 მაისს ევროკავშირის ლიდერებმა სამიტზე ერთობლივი განცხადება მიიღეს, სადაც ევროპულ ავიაგადამზიდავებს მოუწოდეს, თავი შეიკავონ ბელარუსის საჰაერო სივრცეში ფრენისგან, მინსკში Ryanair-ის თვითმფრინავის ინციდენტის გამო.
ამასთან, ევროპულმა საბჭომ მოუწოდა სამოქალაქო ავიაციის საერთაშორისო სააგენტოს, გამოიძიოს ინციდენტი.
მანამდე, ბელარუსის საჰაერო სივრცეში ფრენები შეაჩერეს Lufthansa-მ, KLM-მა, Air Baltic-მა, უკრაინის ავიახაზებმა.
ავიაკომპანიების გადაწყვეტილება უკავშირდება Ryanair-ის თვითმფრინავის ინცინდენტს, რომელიც ათენიდან ვილნიუსში მიფრინავდა და ბელარუსის დიქტატორულმა რეჟიმმა იძულებით დასვა მინსკის აეროპორტში ოპოზიციონერი ჟურნალისტის, Nexta-ის ყოფილი რედაქტორის რომან პრატასევიჩის დაკავების მიზნით.
ბელარუსის სახელისუფლებო მედიის ცნობით, თვითმფრინავი მინსკში ბორტზე არსებული ასაფეთქებელი მოწყობილობის შესახებ შესული ინფორმაციის საფუძველზე დასვეს. ჩხრეკის შედეგად, ბორტზე არავითარი ასაფეთქებელი ნივთიერება აღმოუჩენიათ.