ნავთობპროდუქტების მწარმოებელთა, იმპორტიორთა და მომხმარებელთა კავშირი განცხადებას ავრცელებს, რომელშიც საუბრობს თუ რატომ არ არის საქართველოში საწვავის ფასის შემცირება ნავთობის ფასის კლების (140 დოლარიდან 70-80 დოლარამდე ბარელზე) ადეკვატური.
"2008 წლის ივნისი-აგვისტოს თვეებში, როდესაც სტატისტიკურად ყველაზე მაღალი ფასები ფიქსირდებოდა ნავთობზე (135-145) დოლარი ბარელზე, ბენზინის საერთაშორისო ფასი «PLATT"S EUROPEAN MARKETSCAN»-«FOB MED (ITALY)»-ის მიხედვით, რომლითაც ხორციელდება იმპორტი ჩვენთან საშუალოდ შეადგენდა 1100 დოლარს/ტონაზე, ხოლო დღეისათვის საშუალო ფასი შეადგენს 700 დოლარს/ტონაზე. ანუ რეალურად ფასი 1 ტონა ბენზინისა შემცირებულია საშუალოდ 35 პროცენტით", _ ნათქვამია განცხადებაში.
რაც შეეხება საცალო ქსელს, ნავთობპროდუქტების მწარმოებელთა, იმპორტიორთა და მომხმარებელთა კავშირი განმარტავს, რომ იმ პერიოდში (2008 წლის ივნისი-აგვისტოს თვეებში) რეგულარის ტიპის ბენზინის ფასის ყველაზე მაღალი ფასი საცალო ქსელში შეადგენდა საშუალოდ 1.90-2.00 ლარს. "ბენზინის ფასის 35 პროცენტიანი შემცირება ეს არის ლიტრაზე საშუალოდ 65_თეთრიანი კლება. რეალურად დღეისათვის აღნიშნული კატეგორიის საწვავი საცალო ქსელში იყიდება 1.60-1.72 ლარის ფარგლებში. აქვე უნდა ვთქვათ, რომ იმ პერიოდისათვის ლარის გაცვლითი კურსი დოლართან მიმართებაში იყო 1.43-1.45, დღესათვის კი არის 1.72-1.73. ანუ ლარის გაუფასურებამ გამოიწვია საწვავის თვითღირებულების ზრდა საშუალოდ 30 თეთრით ლიტრაზე".
ნავთობპროდუქტების მწარმოებელთა, იმპორტიორთა და მომხმარებელთა კავშირი აღინშნავს, რომ საფინანსო კრიზისის მიუხედავად მსხვილ ნავთობკომპანიებს არ შეუმცირებიათ ინვესტიციების მოცულობები, პირიქით გაზარდეს კიდეც. თითოეული მათგანი 25-30 მილიონი ლარის ინვესტიციას ახორციელებს წლის განმავლობაში. ასევე არ შემცირებულა პერსონალი და მათზე გასაცემი ხელფასები.
"ასევე უნდა აღვნიშნოთ, რომ სწორედ აღნიშნული პერიოდის შემდგომ მოხდა საბანკო კრედიტებზე პროცენტის მნიშვნელოვანი ზრდა და აქვე უნდა ითქვას, რომ ნავთობკომპანიები ძირითადად საბანკო კრედიტებზე მუშაობენ", _ ნათქვამია განცხადებაში.