საქართველოს პრეზიდენტი მიხეილ სააკაშვილი ქუთაისის მერის ნუგზარ შამუგიას მუშაობით უკმაყოფილოა. მიხეილ სააკაშვილმა შამუგია ტელეკამერების წინ გააკრიტიკა და გაფრთხილება მისცა.
პრეზიდენტმა ქუთაისის მერს დასუფთავების პრობლემის მოგვარება და სოციალური დახმარების დროულად გაცემა მოსთხოვა.
სააკაშვილის განცხადებით, მან მიიღო წერილი სოციალურად დაუცველი ოჯახისაგან და დღეს ამ ოჯახს პირადად ესტუმრა. ოჯახში 14 სული ერთოთახიან ბინაში მძიმე პირობებში ცხოვრობს.
"ეს ხალხი ყოველდღე ცხოვრობს ნაგავში. თქვენს ადგილზე დავაინტერესებდი მოსახლეობას და ყველა ერთად გავწმენდდით ამ პარკებს. შეუძლებელია, ბავშვები, რომლებიც ყოველდღე ამას უყურებენ, ნორმალურები გაიზარდონ", _ განაცხადა სააკაშვილმა.
