ოპოზიციის წარმომადგენელი გია თორთლაძე პარლამენტს საფრანგეთის მიერ რუსეთისთვის ორი სამხედრო ავიამზიდის შესაძლო მიყიდვის საკითხთან დაკავშირებით რეაგირებას სთხოვს. თორთლაძემ ეს საკითხი დღეს ბიუროს სხდომაზე დააყენა. პარლამენტის თავმჯდომარის გადაწყვეტილებით, პარლამენტის საპროტესტო მიმართვას პარიზში ან საგარეო საქმეთა კომიტეტი, ან თავად პარლამენტის თავმჯდომარე დავით ბაქრაძე გაგზავნის.
"საფრანგეთი, რომელიც წესით მუდმივად უნდა აპელირებდეს რუსეთის მხრიდან სარკოზის ინიციატივით ხელმოწერილი საერთაშორისო ხელშეკრულების უხეშად დარღვევისა და აღებული ვალდებულებების შეუსრულებლობის ფაქტზე, ორი სამხედრო ავიამზიდის რუსეთისთვის მიყიდვას აპირებს. ამ სამხედრო ხომალდების შავ ზღვაში შეშვება, მით უფრო იმ ფონზე, როცა რუსეთი აგრესიით არამხოლოდ საქართველოს, არამედ უკრაინასაც ემუქრება, წარმოუდგენელია~, - განაცხადა თორთლაძემ.
ბაქრაძემ კი განაცხადა, რომ აღნიშნულ საკითხთან დაკავშირებით დიპლომატიური მუშაობა გააქტიურებულია.
რაც შეეხება პარლამენტს, საკითხზე პლენარული სხდომის ფორმატში მსჯელობა არ მოხდება, თუმცა როგორც ბაქრაძემ აღნიშნა, შესაბამისი მიმართვა პარიზში ან საგარეო საქმეთა კომიტეტის, ან თავად მის მიერ გაიგზავნება.