საქართველოს საგარეო საქმეთა მინისტრი გრიგოლ ვაშაძე რუსეთის მიერ ფრანგული უნივერსალური სადესანტო ხომალდ "მისტრალის" შესაძლო შეძენის გამო "უკიდურეს შეშფოთებას" გამოთქვამს.
"ამგვარი ხომალდების ერთადერთი დანიშნულების ადგილი შავი ზღვაა", - განაცხადა ვაშაძემ პარიზში, საფრანგეთის საერთაშორისო ურთიერთობათა ინსტიტუტში გამოსვლისას და აქვე განმარტა, რომ რუსეთის მიერ აღნიშნული ხომალდის შეძენის შემთხვევაში "შედეგები შესაძლოა დამღუპველი იყოს".
"ჩვენ უკიდურესად შეშფოთებულები ვართ. საქართველოს სურს გაიგოს, რისთვის სჭირდება რუსეთს ეს სადესანტო ხომალდი", - განმარტა მან.
ვაშაძის მიერ პარიზში გაკეთებულ აღნიშნულ განცხადებას Aსსოციატედ Pრესს-ი ავრცელებს.
შეგახსენებთ, რომ რუსეთის საზღვაო ძალების მეთაურმა ვლადიმერ ვისოცკიმ განაცხადა, რომ "მისტრალის" კლასის ხომალდის ყოლის შემთხვევაში რუსეთის საზღვაო ძალებს საშუალება ექნებოდათ უფრო ეფექტური ოპერაცია განეხორციელებინათ შავ ზღვაზე საქართველოსთან შარშანდელი აგვისტოს ომის დროს. მან ასევე განაცხადა, რომ აღნიშნულ ხომალდს მხოლოდ 40 წუთი დასჭირდება იმ ამოცანის შესასრულებლად, რომელსაც რუსეთის შავი ზღვის ფლოტი 26 საათში ასრულებდა.
აღსანიშნავია, რომ ფრანგული უნივერსალური სადესანტო ხომალდი "მისტრალი" ამავე დროს ვერტმფრენმზიდიცაა.