გურჯაანის რაიონის სოფელ ველისციხის მოსახლეობა საქმის გარკვევას ითხოვს. როგორც ადგილობრივებმა კახეთის საინფორმაციო ცენტრს აცნობეს, უცნობი ადამიანი გზაზე მიმავალ ქალებს პირზე ხელს აფარებს და ფიზიკურად ძალადობს.
ადგილობრივების ვარაუდით, უცნობი, შესაძლოა, მანიაკი იყოს. მოსახლეობის ნაწილი პანიკაშია და ვითარების გარკვევას სამართალდამცავებისგან ითხოვს. მომხდართან დაკავშირებით შს გურჯაანის სამმართველოში გამოძიება ამ დრომდე არ არის დაწყებული.
უნდა აღინიშნოს, რომ უცნაური ფაქტები გურჯაანის კიდევ ორ სოფელში დაფიქსირდა, ვეჯინსა და ჩუმლაყში. სოფელ ვეჯინის ერთ-ერთ უბანში მოსახლეობას საცხოვრებელ სახლებში ქვებს ესვრიან, თუმცა ხალხი ვერ ხედავს, ქვებს ვინ ისვრის. ჩუმლაყის მაცხოვრებლები კი ამბობენ, რომ ფეხის ხმა ესმით, მაგრამ ვერავის ვერ აფიქსირებენ.
