გასაგებია, რომ ჯანდაცვის უწყების მთელი ყურადღება მობილიზებულია კორონავირუსის გავრცელებასა და მასთან საბრძოლველად, თუმცა ჯანდაცვის სხვა მიმართულებებიც არ უნდა დაზარალდეს ამ პერიოდში, - აცხადებს ჯანდაცვის ექსპერტი, ჯანდაცვისა და სოციალური პოლიტიკის კვლევების ცენტრის დირექტორი სერგო ჩიხლაძე
მისი თქმით, ყველა ის ხარვეზი, რაც არსებობდა წინა წლებში, კვლავ მოუგვარებელია.
"ყველაზე დიდი სახელმწიფო პროგრამა, ისევე როგორც წინა წლებში, კვლავ დეფიციტურია. განვლილი 3 თვის პერიოდში, საყოველთაო ჯანდაცვის პროგრამაში ფაქტიურმა ხარჯვამ 261 მილიონი ლარი შეადგინა. მსგავსი ტენდენციით, ამ პროგრამაში წლის ბოლოს დანახარჯი 1 მილიარდ ლარს გადააჭარბებს.
ცნობილია, რომ 2020 წლის საყოველთაო ჯანდაცვის წლიური ბიუჯეტი შეადგენს მხოლოდ 757 მილიონ ლარს. ამას ემატება სახელმწიფოს წინა წლის დავალიენება სამედიცინო დაწესებულებების მიმართ, რომელიც სრულად გასტუმრებული დღესაც არ არის", - აცხადებს ჩიხლაძე.