კორონავირუსის პანდემიით შექმნილი ვითარების გათვალისწინებით, შეერთებული შტატების ხელისუფლებამ მიიღო გადაწყვეტილება სტანდარტული ვიზებიც გაცემის შეჩერების შესახებ, მთელი მსოფლიოს მასშტაბით. ამის შესახებ ინფორმაციას სახელმწიფო დეპარტამენტი ავრცელებს.
"COVID-19- ის პანდემიის შედეგად გამოწვეული სერიოზული გლობალური სირთულეების გათვალისწინები, სახელმწიფო დეპარტამენტი დროებით აჩერებს სტანდარტული სავიზო მომსახურებების მუშაობას შეერთებული შტატების ყველა საელჩოსა და საკონსულოში.
საელჩოები და საკონსულოები 2020 წლის 20 მარტის დროისთვის გააუქმებენ ყველა დაგეგმილ შეხვედრას საიმიგრაციო და არასაიმიგრაციო ვიზების გაცემის მიზნით", - აღნიშნულია განცხადებაში.
ამავე დროს, სახელმწიფო დეპარტამენტი აცხადებს, დიპლომატიური წარმომადგენლობები გასცემენ ვიზებს, რომლებიც დაკავშირებულია შეერთებულ შტატებში გამგზავრების გადაუდებელ საჭიროებასთან.
დეპარტამენტი არ ასახელებს თარიღს, თუ როდის აღდგება სავიზო განყოფილებების მუშაობის სტანდარტული რეჟიმი.
18 მარტს სახელმწიფო დეპარტამენტმა გამოაცხადა, რომ შეერთებულმა შტატებმა შეაჩერა ვიზის გაცემა მსოფლიოს უმეტეს ნაწილში.
19 მარტს, სახელმწიფო დეპარტამენტმა მოუწოდა თანამოქალაქეებს COVID-19- ის ინფექციის საფრთხის გამო, არ იმოგზაურონ საზღვარგარეთ.