ჩეხეთის დედაქალაქ პრაღის საქალაქო საბჭომ მიიღო დადგენილება პრაღაში რუსეთის საელჩოს წინ მდებარე მოედნისთვის რუსი ოპოზიციონერის, კრემლის აქტიური კრიტიკოსის ბორის ნემცოვის სახელის მინიჭების შესახებ.
გარდა ამისა, საქალაქო საბჭოს დეპუტატებმა მიიღეს გადაწყვეტილება რუსეთის საელჩოს მიმდებარედ არსებულ ერთ-ერთ ხეივანს რუსეთში მოკლული ჟურნალისტის ანა პოლიტკოვსკაიას სახელის მინიჭების შესახებ.
ორივე გადაწყვეტილება დეპუტატების მიერ ერთხმად იქნა მიღებული.
პრაღის მერი მიკრობლოგ ტვიტერზე გამოეხმაურა საქალაქო საბჭოს ამ გადაწყვეტილებებს და აღნიშნა, რომ ნემცოვი და პოლიტკოვსკაია იყვნენ ადამიანები, რომლებიც იცავდნენ დემოკრატიას და დაიღუპნენ ამის გამო.
მოედანზე, რომელსაც ბორის ნემცოვის სახელი მიენიჭება, სადაც რამდენიმე დიპლომატიური მისიაა განთავსებული, მათ შორის რუსეთის საელჩო. შესაბამისად, რუსეთის საელჩოს მისამართი შეიცვლება და გახდება "ბორის ნემცოვის მოედანი, სახლი N1".
რუსეთის საელჩოს მიმდებარედ არსებულ ერთ-ერთ ხეივანს კი ანა პოლიტკოვსკაიას სახელი მიენიჭება.
2018 წელს მსგავსი გადაწყვეტილება მიიღეს შეერთებული შტატების დედაქალაქ ვაშინგტონში, სადაც ქუჩას, სადაც რუსეთის საელჩო მდებარეობს, ბორის ნემცოვის სახელი უწოდეს.
ბორის ნემცოვი ელცინის მთავრობის ვიცე-პრემიერი, პუტინის აქტიური კრიტიკოსი იყო და იგი ცდილობდა ეფექტური ოპოზიციური ძალის შექმნას.
ნემცოვი 2015 წლის 27 თებერვალს, კრემლთან ახლოს, ხიდზე, ცეცხლსასროლი იარაღით მოკლეს.
2017 წლის ივლისში მოსკოვის სასამართლომ 5 ადამიანს ჩეჩნეთის რეგიონიდან ნემცოვის მკვლელობის ბრალდებით ხანგრძლივი პატიმრობა მიუსაჯა.
თუმცა ნემცოვის ახლობლები და თანამოაზრეები მიიჩნევენ, რომ მისი მკვლელობა ბევრად მაღალ ეშელონებში დაიგეგმა და მართლმსაჯულება მხოლოდ ფორმალურად აღსრულდა.
