ბერლინში ლიბიის კრიზისთან დაკავშირებით საერთაშორისო კონფერენცია მიმდინარეობს.
კონფერენციაში მონაწილეობენ დელეგაციები გერმანიიდან, რუსეთიდან, გაერთიანებული სამეფოდან, საფრანგეთიდან, ჩინეთიდან, არაბეთის გაერთიანებული საემიროებიდან, თურქეთიდან, კონგოდან, იტალიიდან, ეგვიპტედან, ალჟირიდან, ასევე გაეროს, ევროკავშირის, აფრიკის კავშირისა და არაბული სახელმწიფოების ლიგის წარმომადგენლები.
საერთაშორისო სამშვიდობო კონფერენციას ესწრებიან გერმანიის კანცლერი ანგელა მერკელი, შეერთებული შტატების სახელმწიფო მდივანი მაიკ პომპეო, რუსეთის პრეზიდენტი ვლადიმერ პუტინი, გაეროს გენერალური მდივანი ანტონიო გუტიერეში, საფრანგეთის პრეზიდენტი ემანუელ მაკრონი, თურქეთის პრეზიდენტი რეჯებ ტაიპ ერდოღანი, ბრიტანეთის პრემიერ-მინისტრი ბორის ჯონსონი, ევროკომისიის პრეზიდენტი ურსულა ფონ დერ ლაიენი, ევროკავშირის საბჭოს პრეზიდენტი შარლ მიშელი და სხვები.
ბერლინს ეწვივნენ ასევე ლიბიის დაპირსპირებული მხარეები - გაეროს მიერ აღიარებული, ტრიპოლიში განთავსებული მთავრობის მეთაური ფაიეზ სარაჯი და ლიბიის ეროვნული არმიის ხელმძღვანელი ხალიფა ჰაფთარი.
კონფერენციის დაწყებამდე სახელმწიფოთა ლიდერებმა ორმხრივი შეხვედრებიც გამართეს.
როგორც იუწყებიან, ბერლინში გაძლიერებულია უსაფრთხოების ზომები. კონფერენციას 800-მდე ადგილობრივი და საერთაშორისო ჟურნალისტი აშუქებს.
კონფერენციამდე ცოტა ხნით ადრე, ლიბიაში ცეცხლის შეწყვეტის შეთანხმების მცდელობა ჰქონდათ მოსკოვში, სადაც დაპირისპირებულ მხარეებს შორის მოლაპარაკება გაიმართა.
გავრცელებული ინფორმაციით, ლიბიის ეროვნული არმიის მეთაურმა ხალიფა ჰაფთარმა მოსკოვი ისე დატოვა, რომ ლიბიის ეროვნული თანხმობის მთავრობასთან ცეცხლის შეწყვეტის შესახებ შეთანხმებაზე ხელი არ მოაწერა.
2011 წელს ლიბიის ლიდერის მუამარ კადაფის მკვლელობის შემდეგ ლიბია ფაქტობრივად ორ ნაწილად გაიყო. ამჟამად ქვეყანაში ორხელისუფლებიანობაა გამეფებული.
აღმოსავლეთ ნაწილს განაგებს ხალხის მიერ არჩეული პარლამენტი, დასავლეთ ნაწილს, დედაქალაქ ტრიპოლში, მართავს გაეროსა და ევროკავშირის მიერ მხარდაჭერილი ეროვნული თანხმობის მთავრობა.
აღმოსავლეთ ნაწილის ხელისუფლება ტრიპოლისგან დამოუკიდებლად მოქმედებს და თანამშრომლობს ლიბიის ეროვნულ არმიასთან, რომელსაც ჰაფთარი ხელმძღვანელობს.
