3-წლიანი აკრძალვის შემდეგ, თურქეთში Wikipedia-ზე წვდომა აღდგა.
გასული წლის 26 დეკემბერს გავრცელდა ცნობა, რომ თურქეთის საკონსტიტუციო სასამართლომ Wikipedia-ის აკრძალვა გამოხატვის თავისუფლების შეზღუდვად მიიჩნია და შესაბამის ორგანოებს ინტერნეტენციკპოლედიაზე წვდომის აღდგენა დაავალა.
როგორც იტყობინებოდნენ, სასამართლოს გადაწყვეტილება მას შემდეგ შევიდოდა ძალაში, რაც იგი ოფიციალურ ბეჭდვით ორგანოში გამოქვეყნდებოდა.
თურქეთის მთავრობამ ქვეყანაში Wikipedia 2017 წლის აპრილში აკრძალა. საქმე ეხებოდა ონლაინენციკლოპედიაში არსებულ სტატიას, სადაც ნათქვამი იყო, რომ თურქეთი ისლამურ სახელმწიფოსა და სხვა ტერორისტულ დაჯგუფებებს უჭერდა მხარს.
ანკარამ სტატიის დაუყოვნებლივ წაშლა მოითხოვა, რაზედაც Wikipedia-მ უარით უპასუხა.
ამის შემდეგ, მთავრობამ იხელმძღვანელა 3 წლით ადრე მიღებული კანონით, რაც საშუალებას აძლევდა მას დაბლოკა ყველა ვებგვერდი, რომელიც მათი შეხედულებით, თურქეთის ეროვნულ უსაფრთხოებას უქმნიდა საფრთხეს.
თურქეთის საკონსტიტუციო სასამართლოს გადაწყვეტილებას ვიკიპედიის დამფუძნებელი ჯიმი უელსი გამოეხმაურა და მიკრობლოგ „ტვიტერზე“ დაწერა: "კეთილი იყოს ჩვენი დაბრუნება თურქეთში!".
