თურქეთის პრეზიდენტი რეჯებ ტაიპ ერდოღანი, ლიბიის ეროვნული მთავრობის მხარდასაჭერად, ლიბიაში თურქ სამხედროებს გზავნის. ამის შესახებ ერდოღანმა თავად განაცხადა.
"ჩვენ ვაგზავნით ჩვენს ჯარებს ლიბიაში, რათა უზრუნველყონ ლიბიის ლეგიტიმური მთავრობის მხარდაჭერა და სტაბილურობა.
ჩვენ გავაგრძელებთ ძალების მობილიზებას პოლიტიკური, კომერციული, ჰუმანიტარული, დიპლომატიური და სამხედრო შესაძლებლობების უზრუნველსაყოფად, რათა რეგიონში სტაბილურობის უზრუნველვყოთ", - განაცხადა ერდოღანმა ანკარაში მიმდინარე კონფერენციაზე.
2011 წელს ლიბიის ლიდერის მუამარ კადაფის მკვლელობის შემდეგ ლიბია ფაქტობრივად ორ ნაწილად გაიყო. ამჟამად ქვეყანაში ორხელისუფლებიანობაა გამეფებული.
აღმოსავლეთ ნაწილს განაგებს ხალხის მიერ არჩეული პარლამენტი, დასავლეთ ნაწილს, დედაქალაქ ტრიპოლში, მართავს გაეროსა და ევროკავშირის მიერ მხარდაჭერილი ეროვნული თანხმობის მთავრობა, რომელსაც ასევე თურქეთი უცხადებს მხარდაჭრას.
აღმოსავლეთ ნაწილის ხელისუფლება ტრიპოლისგან დამოუკიდებლად მოქმედებს და თანამშრომლობს ლიბიის ეროვნულ არმიასთან, რომელსაც ჰაფთარი ხელმძღვანელობს.
შეგახსენებთ, ლიბიის კონფლიქტის გადაჭრასთან დაკავშირებით, სამშვიდობო კონფერენცია ბერლინში 19 იანვარს გაიმართება.
