გუშინ, 11 იანვარს, მოსკოვში გერმანიის კანცლერის ანგელა მერკელისა და რუსეთის პრეზიდენტის ვლადიმერ პუტინის შეხვედრა შედგა.
შეხვედრის დაწყებამდე, ანგელა მერკელმა პუტინს მადლობა გადაუხადა მიწვევისა და მრავალ საკითხზე მსჯელობის შესაძლებლობისთვის.
"ყოველთვის ვფიქრობ, რომ სჯობს ვისაუბროთ ერთმანეთთან, ვიდრე ერთმანეთზე ", - თქვა მერკელმა.
როგორც იუწყებიან, შეხვედრაზე მხარეებმა განიხილეს გაზსადენ "ჩრდილოეთის ნაკადი 2"-ის პროექტის დასრულების საკითხი, ირანში არსებული კრიზისული ვითარება და ბერლინში ლიბიის სამშვიდობო მოლაპარაკებების ჩატარების წინადადება.
გაზსადენი "ჩრდილოეთის ნაკადი 2" რუსეთის პრეზიდენტის გეგმის მიხედვით 2020 წლის პირველ ნახევარში უნდა დასრულებულიყო, თუმცა შეერთებული შტატების მიერ დაწესებულმა სანქციებმა ეს პროცესი გაახანგრძლივა.
შეერთებული შტატები თვლის, რომ რუსეთის სახელმწიფო კომპანია "გაზპრომი", რომელიც ახორციელებს "ჩრდილოეთის ნაკადი 2"-ის პროექტს, შესაძლოა გამოყენებულ იქნეს, როგორც "იძულების იარაღი" და გერმანია იქცეს "რუსეთის მძევლად".
"იმედი მაქვს, რომ ამ წლის ბოლოს, ან მომავალი წლის პირველ კვარტალში, სამუშაოები დასრულდება და გაზსადენი დაიწყებს მუშაობას", - თქვა პუტინმა მერკელთან ერთობლივ პრესკონფერენციაზე.
თავის მხრივ, მერკელმა განაცხადა, რომ იგი არ ეთანხმება შეერთებული შტატების მიდგომას "ჩრდილოეთის ნაკადი 2"-ის მიმართ და ეს პროექტი უცილობლად უნდა დასრულდეს.
მისივე თქმით, "სანქციების მიუხედავად, შესაძლებელი იქნება გაზსადენის დასრულება... გარკვეული შეფერხებაა, მაგრამ ეს დასრულდება".
ჩრდილოეთის ნაკადი 2
"ჩრდილოეთის ნაკადი 2"-ის პროექტი უზრუნველყოფს რუსეთიდან გერმანიისთვის გაზის მიწოდებას ბალტიის ზღვის ფსკერის გავლით, რითაც რუსეთი თავის მრავალწლიან ზრახვას, შეამციროს ენერგომატარებლების ექსპორტის დამოკიდებულება უკრაინის გზით ტრანზიტზე, მოიყვანს სისრულეში.
ის ასევე გაივლის ფინეთის, შვედეთისა და დანიის ტერიტორიულ ან ექსკლუზიურ ეკონომიკურ ზონებს.
გაზსადენს კრემლთან დაახლოებული "გაზპრომის" კუთვნილი კომპანია Nord Stream 2 AG აშენებს, რომელსაც პარტნიორობას გერმანული და ინგლისურ-ჰოლანდიური კომპანიები უწევენ.
გაზსადენის პროექტს აკრიტიკებენ შეერთებული შტატები და ევროკავშირის რამდენიმე ქვეყანა, რადგან თვლიან, რომ ის მეტად გაზრდის ევროპის ენერგოდამოკიდებულებას რუსეთზე. 2018 წელს ევროპარლამენტმა გაზსადენის მშენებლობის პროექტი დაგმო.
მხარეებმა ასევე იმსჯელეს ახლო აღმოსავლეთსა და ჩრდილოეთ აფრიკაში არსებულ ვითარებაზე.
მერკელმა აღნიშნა, რომ ირანის აღიარება უკრაინული თვითმფრინავის ჩამოგდების შესახებ "მნიშვნელოვანი ნაბიჯი" იყო.
გერმანიის კანცლერმა მოუწოდა ირანის ხელისუფლებას სრულყოფილი და გამჭვირვალე გამოძიების ჩატარებისკენ.
ანგელა მერკელმა ისაუბრა ლიბიაში არსებული კონფლიქტის შესახებ და სურვილი გამოთქვა, ბერლინში გაიმართოს ცეცხლის შეწყვეტის შესახებ მოლაპარაკებები.
მან ხაზი გაუსვა იმას, რომ მოლაპარაკებების წარმმართველი იქნება გაერთიანებული ერების ორგანიზაცია და არა გერმანია.
"იმედი მაქვს, ლიბია მალე გახდება სუვერენული და მშვიდობიან ქვეყანა", - დასძინა მერკელმა.
ჟურნალისტების მიერ პუტინის მიმართ დასმულ შეკითხვაზე, თუ რა კომენტარს გააკეთებდა ლიბიის ტერიტორიაზე კონფლიქტი ჩართულ რუს ბოევიკებთან დაკავშირებით, რუსეთის პრეზიდენტმა უპასუხა:
"თუ იქ არიან რუსეთის მოქალაქეები, მაშინ ისინი არ მოქმედებენ რუსეთის სახელმწიფოს სახელით და არ ფინანსდებიან რუსული ფულით".