შეერთებული შტატების პრეზიდენტი დონალდ ტრამპი გამოეხმაურა შაბათს, თეირანში ჩატარებულ საპროტესტო აქციას, სადაც მოსახლეობამ აღშფოთება გამოხატა თავისი ხელისუფლების მიმართ, უკრაინული თვითმფრინავის ჩამოგდების გამო.
ტრამპმა მხარდაჭერა გამოუცხადა "მამაც ირანელ ხალხს" და მიკრობლოგ ტვიტერზე სპარსულ და ინგლისურენოვანი განცხადებები გააკეთა.
"ირანელ მამაც და მრავალჭირნახულ ხალხს: ჩემი პრეზიდენტობის პირველივე დღიდან თქვენს გვერდით ვდგავარ. ჩემი ადმინისტრაცია გააგრძლებს თქვენს გვერდით დგომას.
ყურადღებით ვადევნებთ თვალყურს თქვენს პროტესტს და შთაგონებულები ვართ თქვენი სიმამაცით", - დაწერა ტრამპმა.
აშშ-ს პრეზიდენტის თქმით, ირანის ხელისუფლებამ "უნდა მისცეს უფლებადამცველ ჯგუფებს შესაძლებლობა, რათა მათ მოახდინონ მონიტორინგი უშუალოდ იმ ადგილიდან, სადაც პროტესტი მიმდინარეობს".
"მშვიდობიანი დემონსტრანტების დახოცვა ან ინტერნეტის გამორთვა დაუშვებელია. მსოფლიო თვალს გადევნებთ", - დაწერა მან მოგვიანებით.
შაბათს, ასობით სტუდენტი შეიკრიბა თეირანში ამირ ქაბირის უნივერსიტეტის შენობის წინ, რათა პატივი მიეგოთ უკრაინული თვითმფრინავის კატასტროფისას დაღუპულებისთვის. შეკრება მალევე საპროტესტო აქციაში გადაიზარდა.
მომიტინგეები გმობდნენ ხელისუფლების უგუნურებას და მოითხოვდნენ მაღალი თანამდებობის პირების გადადგომას. ასევე თვითმფრინავის ჩამგდებისთვის პასუხისმგებელთა დასჯას.
გუშინ, 11 იანვარს, გამთენიისას, ირანის შეიარაღებული ძალების გენერალურმა შტაბმა აღიარა თვითმფრინავის ჩამოგდება და ამას ადამიანური შეცდომა უწოდა.
ირანის ხელისუფლება ავიაკატასტროფის პირველივე დღიდან თვითმფრინავის ჩამოგდებას ძრავის აალებას უკავშირებდა და მომხდართან ყოველგვარ კავშირს კატეგორიულად უარყოფდა.
სამგზავრო თვითმფრინავი Boeing 737, რომელიც თეირანიდან კიევს 8იანვარს მიემგზავრებოდა, თეირანში, იმამ ხომეინის საერთაშორისო აეროპორტიდან აფრენიდან 2 წუთში ჩამოვარდა.
თვითმფრინავში 167 მგზავრი და ეკიპაჟის 9 წევრი იმყოფებოდა. ყველა მათგანი დაიღუპა. მათ შორის იყვნენ უკრაინის, ირანის, ავღანეთის, კანადის, დიდი ბრიტანეთის, გერმანიისა და შვედეთის მოქალაქეები.