კანადის პრემიერ-მინისტრის ჯასტინ ტრუდოს განცხადებით, კანადა ირანისგან სრულყოფილი და გამჭვირვალე გამოძიების ჩატარებას მოელის. ეს განცხადება ტრუდომ მას შემდეგ გააკეთა, რაც მსოფლიომ ირანის მიერ უკრაინული ავიალაინერის ჩამოგდების აღიარების შესახებ შეიტყო.
ჯასტინ ტრუდოს თქმით, ავიაკატასტროფის სრულყოფილი გამოძიების ჩატარების პროცესში კანადური მხარეც ჩაერთვება.
დღეს, 11 იანვარს, გამთენიისას, ირანის შეიარაღებული ძალების გენერალურმა შტაბმა აღიარა თვითმფრინავის ჩამოგდება და ამას ადამიანური შეცდომა უწოდა.
ირანის ხელისუფლება ავიაკატასტროფის პირველივე დღიდან თვითმფრინავის ჩამოგდებას ძრავის აალებას უკავშირებდა და მომხდართან ყოველგვარ კავშირს კატეგორიულად უარყოფდა.
სამგზავრო თვითმფრინავი Boeing 737, რომელიც თეირანიდან კიევს 8იანვარს მიემგზავრებოდა, თეირანში, იმამ ხომეინის საერთაშორისო აეროპორტიდან აფრენიდან 2 წუთში ჩამოვარდა.
თვითმფრინავში 167 მგზავრი და ეკიპაჟის 9 წევრი იმყოფებოდა. ყველა მათგანი დაიღუპა. მათ შორის იყვნენ უკრაინის, ირანის, ავღანეთის, კანადის, დიდი ბრიტანეთის, გერმანიისა და შვედეთის მოქალაქეები.