უკრაინის პრეზინდენტი ვოლოდიმირ ზელენსკი ირანის მიერ უკრაინული თვითმფრინავის ჩამოგდებას სოციალურ ქსელში ეხმიანება.
ზელენსკიმ ფეისბუკით გავრცელებულ განცხადებაში, ირანს რამდენიმე მოთხოვნა წაუყენა.
"ირანმა თავი დამნაშავედ ცნო უკრაინული თვითმფრინავის ჩამოგდებაში. ჩვენ ირანისგან ველით, რომ მზად იქნება სრული და ღია გამოძიებისთვის, დაღუპულთა ცხედრების დაბრუნებისთვის, კომპენსაციის გადახდისა და დიპლომატიური გზით ოფიციალური ბოდიშისთვის", - დაწერა ზელენსკიმ ფეისბუკზე.
დღეს, 11 იანვარს, გამთენიისას, ირანის შეიარაღებული ძალების გენერალურმა შტაბმა აღიარა თვითმფრინავის ჩამოგდება და ამას ადამიანური შეცდომა უწოდა.
ირანის ხელისუფლება ავიაკატასტროფის პირველივე დღიდან თვითმფრინავის ჩამოგდებას ძრავის აალებას უკავშირებდა და მომხდართან ყოველგვარ კავშირს კატეგორიულად უარყოფდა.
