რუსეთის საგარეო საქმეთა სამინისტროს ინფორმაციით, უკრაინის საპროტესტო ნოტა, რომელიც რუსეთის პრეზიდენტის ვლადიმერ პუტინის ყირიმში ვიზიტს მოჰყვა, "საფუძვლების არარსებობის გამო" კიევს უკან დაუბრუნდა.
"ეს ნოტა, პროტესტის საფუძვლების არარსებობის გამო რუსეთის საგარეო საქმეთა სამინისტრომ უკრაინულ მხარეს უკან დაუბრუნა. რუსეთის პრეზიდენტი და სხვა თანამდებობის პირები თავიანთ ვიზიტებს უცხო ქვეყნის ხელისუფლებებს არ უთანხმებენ", - ნათქვამია რუსეთის საგარეო უწყების განცხადებაში.
9 იანვარს, რუსეთის შავი ზღვის ფლოტის სამხედრო წვრთნებზე თვალყურის სადევნებლად, პუტინი ანექსირებულ ყირიმში ჩავიდა.
პუტინის ვიზიტი კიევმა უკრაინის სუვერენიტეტის შელახვად შეაფასა და რუსეთს საპროტესტო ნოტა გადასცა.
რუსეთის ფედერაციამ უკრაინის კუთვნილი ყირიმის ნახევარკუნძულის ანექსია 2014 წლის მარტში განახორციელა.