დიდი ბრიტანეთის ხელისუფლება ამზადებს სანქციების ახალ პაკეტს უცხო ქვეყნის მოქალაქეების წინააღმდეგ, რომლებიც ადამინის უფლებების დარღვევაში არიან მხილებულნი. იტყობინება Financial Times-ი.
გამოცემის ცნობით, ლონდონი სანქციების ამოქმედებას ბრიტანეთის ევროკავშირიდან გასვლის შემდეგ გეგმავს.
სანქციები ითვალისწინებს უცხო ქვეყნის მოქალაქეებისთვის ბრიტანული აქტივების გაყინვასა და ქვეყნაში შესვლის აკრძალვას.
გამოცემა, წყაროებზე დაყრდნობით ვარაუდობს, რომ სანქცირებულთა სიაში უპირველესად რუსეთის, ლიბიისა და ჩრდილოეთ კორეის რამდენიმე მოქალაქე მოხვდება.
2018 წელს, ბრიტანეთის ქალაქ სოლსბერიში სერგეი სკრიპალისა და მისი ქალიშვილის მოწამვლის შემდეგ, ბრიტანეთის პარლამენტმა მიიღო მაგნიტსკის სიის შესწორება, რომელიც აძლევს საშუალებას, ევროკავშირისგან დამოუკიდებლად პესრონალური სანქციები დააკისროს უცხოელებს, რომელბიც ეჭვმიტანილნი არიან კორუფციასა და ადამიანის უფლებების დარღვევასთან კავშირში.
გასული წლის დეკემბერში, ევროკავშირმა განაცხადა, რომ გეგმავს "მაგნიტსკის აქტის" ანალოგიური სანქციათა მექანიზმის შემუშავებას.
მაგნიტსკის აქტი
შეერთებულმა შტატებმა 2012 წელს მიიღო "მაგნიტსკის აქტი", რომელიც ითვალისწინებს სანქციებს ადამიანის უფლებების დარღვევაში ბრალდებული რუსეთის მოქალაქეების წინააღმდეგ.
"მაგნიტსკის აქტი, იურისტ სერგეი მაგნიტსკის სახელს ატარებს, რომელიც 2009 წელს მოსკოვის ერთ-ერთ იზოლატორში გარდაიცვალა.
მაგნიტსკი დააკავეს, როცა მუშაობდა რუსეთის სახელმწიფო ბიუჯეტიდან სახსრების მითვისებასთან დაკავშირებული მსხვილმასშტაბიანი კორუფციული სქემის გამოსააშკარავებლად.
2016 წელს შეერთებული შტატების კონგრესმა მიიღო კიდევ ერთი კანონი, რომლითაც პრეზიდენტს ეძლევა უფლებამოსილება, განაახლოს იმ უცხოელთა სია, რომლებიც დამნაშავეები არიან კორუფციისა და ადამიანის უფლებების დარღვევაში.
მსგავსი სამართლებრივი აქტები მიიღეს ასევე კანადაში, ესტონეთში, ლატვიაში, ლიეტუვასა და გაერთიანებული სამეფოში.