უკრაინის საერთაშორისო ავიახაზების კუთვნილ თვითმფრინავს, რომელმაც თეირანში კატასტროფა განიცადა, სავარაუდოდ, ირანის ანტისარაკეტო თავდაცვითი სისტემის მიერ ნასროლი რაკეტა შეცდომით მოხვდა. იტყობინება BBC-ი ამერიკულ მედიაზე დაყრდნობით.
ამერიკული ტელეკომპანია CBS-ის ინფორმაციით, შეერთებული შტატების ოფიციალური პირები დარწმუნებულები არიან, რომ თვითმფრინავი სარაკეტო დარტყმის შედეგად ჩამოვარდა.
CBS News-ი წყაროზე დაყრდნობით აცხადებს, რომ აშშ-ის დაზვერვამ სატელიტის მეშვეობით მოიპოვა ორი რაკეტის ინფრაწითელი გამოსახულება, რომელსაც მალევე რადარზე აფეთქების ამსახველი გამოსახულება მოჰყვა.
მანამდე უკრაინულმა მხარემ განაცხადა, რომ ავიაკატასტროფის ერთ-ერთ მიზეზად სარაკეტო დარტყმასაც განიხილავდა, რაც ირანმა კატეგორიულად გამორიცხა.
თვითმფრინავის ჩამოგდების ვერსიებთან დაკავშირებით, ვარაუდი გამოთქვა შეერთებული შტატების პრეზიდენტმაც, რომელმაც განაცხადა, რომ თვითმფრინავთან დაკავშირებით "ჩემი ეჭვი მაქვს, შეიძლება ვინმემ შეცდომა დაუშვას“.
სამგზავრო თვითმფრინავი Boeing 737, რომელიც თეირანიდან კიევს მიემგზავრებოდა, თეირანში, იმამ ხომეინის საერთაშორისო აეროპორტიდან აფრენიდან 10 წუთში ჩამოვარდა. კატასტროფის ზუსტი მიზეზები ჯერ არ არის გამორკვეული, თუმცა ირანული მხარე იტყობინება, რომ ეს შესაძლოა ძრავის აალებას გამოეწვია.
თვითმფრინავში 167 მგზავრი და ეკიპაჟის 9 წევრი იმყოფებოდა. ყველა მათგანი დაიღუპა. მათ შორის იყვნენ უკრაინის, ირანის, ავღანეთის, კანადის, დიდი ბრიტანეთის, გერმანიისა და შვედეთის მოქალაქეები.