გუდაურში 5 დღე არ არის წყალი და ესენი ქეიფობენ მცხეთაში. ამ დროს მე დავყრიდი ყველაფერს, გავიქცეოდი, წავიყვანდი იქ მთელ მთავრობას და გავაკეთებდით ყველაფერს, ზუსტად ერთ საათში, - განაცხადა საქართველოს ყოფილმა პრეზიდენტმა მიხეილ სააკაშვილმა.
მისი თქმით, ბაკურიანში წყალი თითქმის არავის არ აქვს, გარდა გამგებლის პირადი სასტუმროსი.
„ახლა იკარგება არა მხოლოდ შემოსავლები, იკარგება პერსპექტივები ჩვენი კურორტებისთვის.ბაკურიანში წყალი თითქმის არავის არ აქვს, გარდა გამგებლის პირადი სასტუმროსი. გაჩერდა ის პროექტები, რომლებიც მე დავიწყე. სვანეთში მე ავაშენე კურშაველის სიდიდის სათხილამურო კურორტი, რომელიც იქნებოდა ყველაზე დიდი სათხილამურო კურორტი ევროპაში.უზარმაზარი რეკლამა გავაკეთე, საბაგიროები ჩამოვიტანეთ.
გააჩერეს ყველაფერი, გზებიც გააჩერეს, კორუფციის გამო. ივანიშვილის პირადი ბოღმის გამო. არადა, სადაც არის მთის კურორტები იქ შეუძლებელია ხალხი იყოს ღარიბი.
ყველგან სადაც არის სათხილამურო ტრასები, ყველგან ხალხს აქვს მაღალი შემოსავლები და ხალხი მდიდრდება. ჩემი გათვლებით 2019 წლისთვის 2012 წელთან შედარებით 8-ჯერ უნდა გაზრდილიყო სამთო კურორტებზე ჩამომსვლელთა რაოდენობა.
აქ ძალიან ცოტა ზრდაა და ამ ყველაფერზე პასუხისმგებლობა ეკისრება ივანიშვილს, რომელსაც პირადი ბოღმისა და სიხარბის გამო უნდა ფასი დაუგდოს ამ კურორტებს და მერე ყველა ჩაიგდოს ჯიბეში. სასწრაფოდ არის ყველაფერი შესაცვლელი და ინფრასტრუქტურა არის მოსაწესრიგებელი. წინააღმდეგ შემთხვევაში, ჩვენ ვკარგავთ შემოსავლებს და ვკარგავთ პერსპექტივას. ლამის ბოლო შემოსავლის წყაროს ვკარგავთ ჩვენი ეკონომიკისთვის“, - ამბობს სააკაშვილი ვიდეოში, რომელიც სოციალურ ქსელში გაავრცელა.