პრეზიდენტმა გაასაჯაროვა გადაწყვეტილება და დაასაბუთა ხედვა, რატომ არ მოხვდა მამალაძე შეწყალებულთა სიაში, - განაცხადა საგანგებო ბრიფიგნზე საპატრიარქოს სპიკერმა, მამა ანდრია ჯაღმაიძემ.
მისი თქმით, სინოდის მიერ სალომე ზურაბიშვილისადმი მიწერილი წერილი სრულად გამოხატავდა ეკლესიის ნებას, რომ გათავისუფლებულიყო მამა გიორგი მამალაძე.
“პრეზიდენტმა გაასაჯაროვა გადაწყვეტილება და დაასაბუთა ხედვა, რატომ არ მოხვდა მამალაძე შეწყალებულთა სიაში. რომ არ ვისაუბროთ იმაზე, რომ სინოდის გადაწყვეტილება არის მნიშვნელოვანი და პატიმრისადმი დამოკიდებულება ისედაც გულმოწყალებას გულისხმობს, ჩვენთვის სასურველი და მისაღები იქნებოდა გათავისუფლებულიყო თუნდაც იმიტომ, რომ მიმდინარე პერფორმანსი დასრულდებოდა. მამალაძის მდგომარეობას სპეკულაციები მოჰყვა და, ჩვენი აზრით, ადამიანებმა ისარგებლეს ამით, რომ ეკლესიის წინააღმდეგ გამოიყენეს ეს მდგომარეობა. მძევლადაც კია ეს ადამიანი იმათ ხელში, ვისაც დივიდენდების მოპოვება სურს ეკლესიის წინააღმდეგ", - განაცხადა მამა ანდრია ჯაღმაიძემ.
პრეზიდენტმა დეკანოზი გიორგი მამალაძე არ შეიწყალა. მისი თქმით, საქმე ზედმეტად პოლიტიზირებულია და გადაწყვეტილებაზე თავად სრულად იღებს პასუხისმგებლობას.
"ბოლომდე მოვისმინე ადვოკატების არგუმენტები, დეტალურად გავეცანი წმინდა სინოდის შუამდგომლობას და მივიღე გადაწყვეტილება, რომელზეც მთლიანად ვიღებ პასუხისმგებლობას. ეს გადაწყვეტილება პირველ რიგში სამართლიანობის პრინციპს ეფუძნება. ვერ მოვნახე არგუმენტი, მითუმეტეს შეწყალების კრიტერიუმების გამკაცრების პირობებში, როცა ბევრი მსჯავრდებულის საქმე განხილული ვერ იქნებოდა, რატომ უნდა დაშვებულიყო გამონაკლისი დეკანოზ გიორგი მამალაძის საქმეზე" ,- განაცხადა სალომე ზურაბიშვილმა.
შეგახსენებთ, რომ წმინდა სინოდმა პრეზიდენტს დეკანოზ გიორგი მამალაძის შეწყალების თხოვნით შუამდლომლობით მიმართა. პრეზიდენტის ადმინისტრაციამ შეწყალებასთან დაკავშირებული შუამდგომლობა საქართველოს საპატრიარქოდან 2019 წლის 8 ნოემბერს მიიღო. დეკანოზ მამალაძეს 2017 წლის 5 სექტემბერს 9 წლით თავისუფლების აღკვეთა შეეფარდა.