გვქონდა მოლოდინი რომ პარლამენტი შეინარჩუნებდა იმ ღიაობის და გამჭვირვალობის სტანდარტს რომელიც მან შემოიღო კომიტეტზე, მაგრამ მთელ ამ პროცესმა გვანახა, რომ გვქონდა სერიოზული პრობლემა - ასე ეხმიანება „საქართველოს დემოკრატიული ინიციატივის“ ხელმძღვანელი, გიორგი მშვენიერაძე იურიდიული კომიტეტის გადაწყვეტილებას.
მშვენიერაძის თქმით, კანდიდატები არიან არაკეთილსინდისიერები და არაკომპეტენტურები.
„გვქონდა მოლოდინი რომ პარლამენტი შეინარჩუნებდა იმ ღიაობის და გამჭვირვალობის სტანდარტს რომელიც მან შემოიღო კომიტეტზე და ეს სწორი იყო და გვქონდა მოლოდინი, რომ კანდიდატები შეირჩეოდნენ მათი კვალიფიკაციისა და კეთილსინდისიერების შესაბამისად, მაგრამ მთელ ამ პროცესმა გვანახა რომ გვქონდა სერიოზული პრობლემა. სრულ უმრავლესობას მინიმალური კომპეტენცია არ ჰქონდა არა მოსამართლეობის არამედ იურისტად მუშაობისთვის. ზოგიერთს დიპლომი არ გააჩნია ან გაყალბებული დოკუმენტებით ცდილობს უზენაესი სასამართლოს მოსამართლეობის პოზიციის დაკავებას, ხოლო ზოგიერთ მათგანს კეთილსინდისიერების სერიოზული პრობლემები ჰქონდა.
თუ ამ გასაუბრებამ გვანახა, რომ კანდიდატები იყვნენ არაკომპეტენტურები და არაკეთილსინდისიერები, დღევანდელმა დღემ გვანახა, რომ დეპუტატები არიან სინდისთან ნაკლებობის მქონენი, რადგან მათ დახუჭეს თვალი დაიხშვეს ყურები, დაიმართეს ამნეზია და იმ კანდიდატებს აუწიეს ხელი, რომლებიც არათუ უზენაეს სასამართლოში არამედ საერთოდ სასამართლო სისტემაში არ უნდა იყვნენ“,- განაცხადა გიორგი მშვენიერაძემ პარლამენტის წინ მიმდინარე აქციაზე.