ბათუმში თანამედროვე სტანდარტების კიდევ ერთი სამედიცინო დაწესებულების გახსნა იგეგმება. ამ მიზნით აჭარის ფინანსთა და ეკონომიკის სამინისტრომ ბათუმში, ბარათაშვილის ქუჩა N30-ში მდებარე 801,90 კვ.მ შენობა-ნაგებობების და მასზე წილობრივად დამაგრებული მიწის ნაკვეთი პირობებიან აუქციონზე გამოიტანა. აუქციონი 30 დეკემბრისთვისაა ჩანიშნული და ობიექტის საწყისი ღირებულება 2 მლნ 349 ათას 500 ლარია.
აუქციონში გამარჯვებული სუბიექტი ვალდებულია, ხელშეკრულების გაფორმებიდან არაუგვიანეს 2 თვის ვადაში მინიმუმ 200 ათასი ლარის მოცულობის უპირობო და გამოუხმობი საბანკო გარანტია წარმოადგინოს, რომლის ვადაც არანაკლებ 2 თვით უნდა აღემატებოდეს საინვესტიციო ვალდებულების შესრულების ვადას.
საპრივატიზაციო პირობების თანახმად, ინვესტორი ვალდებული ხდება, რომ ხელშეკრულების გაფორმებიდან არაუგვიანეს 36 თვის ვადაში სამედიცინო დაწესებულებისათვის (არანაკლებ 801,9 კვ.მ. შენობა-ნაგებობა) საჭირო რეკონსტრუქცია/რემონტის სამუშაოების (მათ შორის აღჭურვის) დასრულება მოასწროს.
36 თვის ვადაში აღნიშნულ პროექტში ინვესტორს მინიმუმ 1 500 000 ლარის ინვესტიციის განხორციელება მოუწევს.
ინვესტორის ვალდებულებაა ასევე, სამედიცინო დაწესებულების რეკონსტრუქცია/რემონტის სამუშაოების (მათ შორის აღჭურვის) დასრულებიდან 1 თვის ვადაში სამედიცინო დაწესებულების (არანაკლებ 801,9 კვ.მ შენობა-ნაგებობა) ცალკე საკადასტრო ერთეულად რეგისტრაცია და არანაკლებ 10 წლის ვადით სამედიცინო საქმიანობის პროფილის და არანაკლებ 90% საქართველოს მოქალაქის დასაქმების შენარჩუნება.