სომხეთის პრემიერ მინისტრის ნიკოლ ფაშინიანის მეუღლე ანა აკოფიანი მთიან ყარაბაღში იწვევს აზერბაიჯანის ვიცე-პრეზიდენტსა და პირველ ლედის მეჰრიბან ალიევას.
აღნიშნული მიწვევა ანა აკოფიანმა გაეროს უშიშროების საბჭოს კონფერენციაზე "ქალები, მშვიდობა და უსაფრთხოება" - გააჟღერა.
"მსურს მოვიწვიო მეჰრიბან ალიევა მთიან ყარაბაღში. ის შეიძლება ჩვენი სტუმარი გახდეს. სომეხმა ხალხმა იცის როგორ უნდა მიიღოს სტუმრები. ჩვენ შეგვიძლია შევასრულოთ მისი ოცნება - ის გახდება ჩვენი სტუმარი და მოუსმენს მის საყვარელ სიმღერას "მუღამს" მთიან ყარაბაღში", - თქვა აკოფიანმა.
მისივე თქმით, თუ მეჰრიბან ალიევა მიიღებს მიწვევას, აკოფიანი მზად არის საპასუხო ვიზიტით ბაქოს ეწვიოს.
აკოფიანმა ასევე აღნიშნა, რომ თუ მეჰრიბან ალიევა „მუღამის“ მოსმენის სურვილში ომს გულისხმობდა, მაშინ მას ეს ოცნება აუსრულებელი დარჩება.
"და არამარტო აუსრულებელი დარჩება. თუ ისინი ახალ ომს დაიწყებენ, სავარაუდოდ, ახალი დასახლებები გაჩნდება, სადაც "მუღამს" ვერ მოუსმენენ", - დასძინა მან.
აკოფიანი მეჰრიბან ალიევას ტელეგრამის არხზე გაკეთებულ პოსტს გამოეხმაურა, სადაც ის წერდა, რომ მისი ოცნება მთიან ყარაბაღში ეროვნული მუსიკის, "მუღამის" მოსმენა იყო.