ბერლინში ორი რუსი დიპლომატის ნონ გრატად გამოცხადების გამო რუსეთი იძულებულია საპასუხო ზომები მიიღოს. ამის შესახებ რუსეთის საგარეო საქმეთა სამინისტროში რუსულ მედიას განუცხადეს.
"გერმანული მხარის განცხადებას ბერლინში საელჩოს ორი რუსი თანამშრომლის გაძევების შესახებ, განვიხილავთ, როგორც უსაფუძვლო და არამეგობრულ ქმედებას.
საკითხისადმი პოლიტიზირებული მიდგომა დაუშვებელია. იძულებულნი ვართ მივიღოთ საპასუხო ზომები", - განუცხადეს ჟურნალისტებს უწყებაში.
დღეს ცნობილი გახდა, რომ ბერლინში საქართველოს მოქალაქის ზელიმხან ხანგოშვილის მკვლელობასთან დაკავშირებით გერმანიის ხელისუფლებამ პერსონა ნონ გრატად გამოაცხადა ორი რუსი დიპლომატი და მათ ქვეყნის დაუყოვნებლივ დატოვება უბრძანა.
ასევე გერმანიის საგარეო უწყებამ საპროტესტო ნოტა გადასცა ბერლინში რუსეთის ელჩს სერგეი ნეჩაევს.
დღეს გავრცელდა ინფორმაცია, რომ გერმანიის მთავრობა რუსეთის წინააღმდეგ დიპლომატიური ან სხვა სახის სანქციების დაწესებას განიხილავდა, სწორედ აღნიშნულ მკვლელობასთან რუსეთის ხელისუფლების კავშირის გამო.
აგვისტოში, ბერლინში მოკლეს ზელიმხან ხანგოშვილი, რომელსაც ველოსიპედით მიმავალმა ქილერმა ქუჩაში ესროლა. ხანგოშვილი ადგილზე გარდაიცვალა.
ბერლინის პროკურატურამ დააკავა დანაშაულში ეჭვმიტანილი 49 წლის რუსეთის მოქალაქე.
ეს ხანგოშვილზე მეორე თავდასხმა იყო. 2015 წლის 28 მაისს თბილისში ჩაცხრილეს ავტომობილი, რომელშიც ის იმყოფებოდა. ხანგოშვილი სერიოზულად დაიჭრა. მკურნალობის დასრულებისთანავე მან საქართველო დატოვა.
ზელიმხან ხანგოშვილი 2012 წელს საქართველო-რუსეთის საზღვართან მდებარე სოფელ ლაფანყურის სპეცოპერაციაში შუამავალი იყო. სწორედ ამ სპეცოპერაციას დაუკავშირეს ხანგოშვილის ახლობლებმა 2015 წელს მომხდარი თავდასხმა.