რუსეთის პრეზიდენტი ვლადიმერ პუტინი ამბობს, რომ ნატოს რუსეთის საზღვრებთან სიახლოვე ძირს უთხრის ქვეყნის უსაფრთხოებას.
პუტინი გამოეხმაურა ლონდონში მიმდინარე ნატოს 70 წლის იუბილესთან დაკავშირებულ სამიტს და აღნიშნა, რომ ალიანსი საბჭოთა კავშირისგან დასაცავად შეიქმნა.
"დღეს, ყველასთვის ცნობილია, რომ საბჭოთა კავშირი აღარ არსებობს, არ არსებობს ასევე ვარშავის პაქტი, სამხედრო პაქტი, როემლიც ნატოს საპასუხოდ შეიქმნა. სამაგიეროდ არსებობს ნატო, რომელიც არამხოლოდ არსებობს, არამედ ვითარდება.
თავდაპირველად ალიანსში 12 სახელმწიფო შედიოდა. ახლა კი მის შემადგენლობაში 29 სახელმწიფოა და ალიანსის ქვეყნების ჯამური თავდაცვის ხარჯები გლობალური სამხედრო ხარჯების 70%-ზე მეტია", - თქვა პუტინმა.
მისივე თქმით, ნატოს რუსეთის უსაფრთხოებისთვის პოტენციურ საფრთხეს წარმოადგენს.
"დღეს ჩვენ უნდა გავითვალისწინოთ ის ფაქტი, რომ ნატოს გაფართოება, მისი სამხედრო ინფრასტრუქტურის განვითარება რუსეთის საზღვრებთან ახლოს არის ერთ-ერთი პოტენციური საფრთხე ჩვენი ქვეყნის უსაფრთხოებისთვის", - თქვა პუტინმა.