საფრანგეთის პრეზიდენტი ემანუელ მაკრონი იმედოვნებს, რომ შეერთებულ შტატებთან ერთად შეძლებენ ციფრული გადასახადის დაწესების გამო შექმნილი სიტუაციიდან გამოსავლის პოვნას, რის გამოც ვაშინგტონი აპირებს დამატებით გადასახადების შემოღებას ფრანგულ პროდუქციაზე.
"მე მჯერა, რომ ჩვენ შეგვიძლია ამ სიტუაციიდან გამოსავლის გამონახვა", - თქვა მაკრონმა ლონდონში დონალდ ტრამპთან ერთობლივი პრესკონფერენციის შემდეგ.
ამავდროულად, მაკრონმა აღნიშნა, რომ იგი მზად არის დაიცვას საფრანგეთისა და ევროპის ინტერესები, შეერთებული შტატების ინტერესების პატივისცემის პარალელურად.
დღეს გავრცელებული ინფორმაციით, შეერთებულმა შტატებმა შესაძლოა 2.4 მლრდ დოლარის ღირებულ ფრანგულ პროდუქციაზე 100-პროცენტიანი ტარიფები დააწესოს.
ტარიფების დაწესება შეეხება ფრანგულ ყველს, შამპანურს, კოსმეტიკურ საშუალებებს, ფაიფურსა და ჩანთებს.
აშშ-ის მიერ ტარიფების დაწესება პასუხი იქნება საფრანგეთის მიერ ამერიკულ ტექნოლოგიურ გიგანტ კომპანიებზე ციფრული მომსახურების გადასახადის დაწესებისა.
აშშ-ის სავაჭრო დეპარტამენტის ოფიციალური პირების განცხადებით, საფრანგეთის ციფრული გადასახადი დისკრიმინაციულია და აზარალებს ისეთ ამერიკულ კომპანიებს, როგორებიცაა Google, Apple, Facebook და Amazon-ი.
მათივე თქმით, ასეთივე ტარიფები დაუწესდება ყველა სხვა ქვეყანას, რომელიც საფრანგეთის ანალოგიურ გადაწყვეტილებას მიიღებს.
ვაშინგტონის მიერ დაანონსებულ გადაწყვეტილებას გამოეხმაურა საფრანგეთის ეკონომიკისა და ფინანსების მინისტრი, რომელმაც აღნიშნა, რომ პარიზის წინააღმდეგ დაწესებული სანქციები დაუშვებელია.
ცნობისთვის, 2019 წლის ივლისში საფრანგეთის სენატმა მიიღო კანონი ციფრული კომპანიების დაბეგვრის შესახებ.
ციფრულ კომპანიას, რომელსაც წლიურად 750 მლნ ევროზე მეტი აქვს შემოსავალი და საფრანგეთში მინიმუმ 25 მლნ ევროს გამოიმუშავებს, დამატებითი გადასახადის გადახდა მოუწევს.