საავიაციო ბაზარზე გაზრდილი კონკურენცია სუსტ და არასტრატეგიული კომერციული პოლიტიკის მქონე მოთამაშეებს თამაშის წესებს შეაცვლევინებს, - ავიაციის სექტორის წარმომადგენელი თამუნა თანდაშვილი.
მისი თქმით, ტურიზმის ეროვნული ადმინისტრაციის მიერ გამოქვეყნებული 2019 წლის იანვარ-ნოემბრის სტატისტიკური მონაცემები, თვალსაჩინოდ აჩვენებს საქართველოსადმი გაზრდილ ინტერესს მსოფლიო სამოგზაურო ბაზარზე და მზარდ დინამიკას.
"ის მრავალფეროვანი კამპანიები, აქტივობები, მოლაპარაკებების უწყვეტი პროცესი, რომელსაც კერძო და საჯარო სექტორი ერთობლივად ახორციელებს, ნამდვილად ახდენს გავლენას პოზიტიურ სტატისტიკაზე. გაზრდილი კონკურენცია საავიაციო ბაზარზე სუსტ და არასტრატეგიული კომერციულო პოლიტიკის მქონე მოთამაშეებს თამაშის წესებს შეაცვლევინებს.
საერთაშორისო ძლიერი ბრენდები კი ქვეყანას უფრო დიდი მასშტაბით უწევენ პოპულარიზაციას. ქვეყანას ყველანაირი პირობა აქვს შესთავაზოს პირდაპირი ფრენები, როგორც შედარებით მცირე დისტანციებზე, ასევე უფრო შორეულ მარშრუტებზე", - აცხადებს თანდაშვილი და აღნიშნავს, რომ საქართველოს მიმართ ინტერესი არ ქრება მეზობელი ქვეყნებიდან და მიუხედავად იმისა რომ კვლავ ტრანზიტული გზებითა და სახმელეთო საშუალებებით უწყვეტად ფიქსირდება ნაკადები, არავითარი წინაღობა არ არსებობს საიმისოდ რომ პირდაპირი რეისები არ აღდგეს.
