შეერთებულმა შტატებმა შესაძლოა 2.4 მლრდ დოლარის ღირებულ ფრანგულ პროდუქციაზე 100-პროცენტიანი ტარიფები დააწესოს.
ტარიფების დაწესება შეეხება ფრანგულ ყველს, შამპანურს, კოსმეტიკურ საშუალებებს, ფაიფურსა და ჩანთებს.
ფრანგული პროდუქციის ჩამონათვალი, რომელზედაც ტარიფების დაწესება იგეგმება, 63 პროდუქტს მოიცავს.
აშშ-ის მიერ ტარიფების დაწესება პასუხი იქნება საფრანგეთის მიერ ამერიკულ ტექნოლოგიურ გიგანტ კომპანიებზე ციფრული მომსახურების გადასახადის დაწესებისა.
აშშ-ის სავაჭრო დეპარტამენტის ოფიციალური პირების განცხადებით, საფრანგეთის ციფრული გადასახადი დისკრიმინაციულია და აზარალებს ისეთ ამერიკულ კომპანიებს, როგორებიცაა Google, Apple, Facebook და Amazon-ი.
მათივე თქმით, ასეთივე ტარიფები დაუწესდება ყველა სხვა ქვეყანას, რომელიც საფრანგეთის ანალოგიურ გადაწყვეტილებას მიიღებს.
ცნობისთვის, 2019 წლის ივლისში საფრანგეთის სენატმა მიიღო კანონი ციფრული კომპანიების დაბეგვრის შესახებ.
ციფრულ კომპანიას, რომელსაც წლიურად 750 მლნ ევროზე მეტი აქვს შემოსავალი და საფრანგეთში მინიმუმ 25 მლნ ევროს გამოიმუშავებს, დამატებითი გადასახადის გადახდა მოუწევს.
საფრანგეთის ამ გადაწყვეტილებას მალევე გამოეხმაურა შეერთებული შტატების პრეზიდენტი დონალდ ტრამპი და მას უგუნური უწოდა.
ამავდროულად, შტატების პრეზიდენტმა მიანიშნა, რომ საფრანგეთი მიიღებს საპასუხო რეაქციას.
"საფრანგეთმა დამატებითი გადასახადები დაუწესა ჩვენს დიდებულ ამერიკულ ტექნოლოგიურ კომპანიებს. თუ ვინმემ უნდა დაუწესოს მათ გადასახადები, ეს მათი სამშობლო, ამერიკის შეერთებული შტატებია.
მაკრონის უგუნური გადაწყვეტილების საპასუხოდ, საპასუხო ქმედებების შესახებ უახლოეს მომავალში გამოვაცხადებთ. ყოველთვის ვამბობდი, რომ ამერიკული ღვინო, ფრანგულ ღვინოზე უკეთესია", - დაწერა ტრამპმა "ტვიტერზე".
ტრამპის ადმინისტრაცია მიიჩნევს, რომ ამერიკული ტექნოლოგიური კომპანიების მიმართ საფრანგეთის გადაწყვეტილება უსამართლოა.