რომის პაპი ფრანცისკე აღიარებს, რომ ვატიკანში ფინანსური კორუფციაა და ამ ვითარებას აღწერს, როგორც "სკანდალი". იტყობინება Deutsche Welle.
უმაღლესი პონტიფიკოსის თქმით, ფინანსური კორუფციის გამოძიება გამოავლენს არიან თუ არა დამნაშავეები ვატიკანში.
"კორუფცია არსებობს. ეს აშკარაა. გამოძიება გვაჩვენებს თუ ვინ არის ამაში დამნაშავე. ეს ძალიან მახინჯი მოვლენაა, არ არის კარგი, როცა ასეთი რამ ვატიკანში ხდება", - თქვა რომის პაპმა.
პაპმა ფრანცისკემ ჟურნალისტებს უთხრა, რომ გამოძიება პაპის საქველმოქმედო ფონდის ფინანსების არამიზნობრივ ხარჯვასთან დაკავშირებით მიმდინარეობს. საქმე ეხება ლონდონის ცენტრში ძვირადღირებული აპარტამენტის შეძენას.
მანამდე რომის პაპი ამბობდა, რომ ასეთი სახის შენაძენი, არ ნიშნავს საქველმოქმედო ფონდების ბოროტად გამოყენებას.
აღსანიშნავია, რომ ეს არის პაპი ფრანცისკეს მიერ გაკეთებული პირველი საჯარო კომენტარი ვატიკანში არსებულ ფინანსურ კორუფციასთან დაკავშირებით.