ჰონგ-კონგის ადგილობრივ არჩევნებში, ხმების წინასწარი შედეგების მიხედვით, გაიმარჯვეს პროდემოკრატიული, ოპოზიციური ძალების წარმომადგენლებმა, მოიპოვეს რა ადგილობრივ საბჭოებში მანდატების უმრავლესობა. იუწყება South China Morning Post-ი.
არჩევნები ჰონგ-კონგში, კვირას, 24 ნოემბერს ჩატარდა 18 ოლქში. რეკორდული რაოდენობის ამომრჩეველმა მიიღო მონაწილეობა.
საარჩევნო უბნებთან საერთო ჯამში საკუთარი არჩევანი 2.94 მლნ ადამიანმა დააფიქსირა, რაც რეგისტრირებული ამომრჩევლების 71.2%-ს შეადგენს.
2015 წელს ჩატარებულ არჩევნებში ამომრჩეველთა აქტივობა მხოლოდ 47% იყო. აქამდე საოლქო საბჭოები უმრავლესობით დაკომპლექტებული იყო პროსახელისუფლებო, პროპეკინური ძალების წარმომადგენლებით.
არჩევნების შედეგების გათვალისწინებით, პროდემოკრატიული ბლოკი მიიღებს 120-მდე ადგილს კომიტეტში, რომელიც ირჩევს ჰონგ-კონგის მთავრობის მეთაურს.
აღსანიშნავია, რომ ადგილობრივ საბჭოებს ჰონგ-კონგში პოლიტიკური ძალაუფლება არ გააჩნიათ და რეალური ცვლილებების მოხდენაც არ ხელეწიფებათ. მათი კომპეტენცია ინფრასტრუქტურული და საყოფაცხოვრებო საკითხების მოგვარება და შესაბამისი წინადადებების მომზადებაა მთავრობისთვის წარსადგენად.
ფოტო: AP
