პრინციპულად მნიშვნელოვანია, ხელისუფლების ცვლილების შემდეგ, ენმ-ის ხელში არ აღმოჩნდეს ძალოვანი უწყებები - აცხადებს "გირჩის" ლიდერი ზურაბ ჯაფარიძე "ლეიბორისტული პარტიის" ოფისთან, სადაც ოპოზიციონერი ლიდერები კონსულტაციებს მართავენ.
"პრინციპულად მნიშვნელოვანია, ადამიანებმა დაიჯერონ, რომ ხელისუფლების ცვლილების შემდეგ "ნაციონალური მოძრაობის" ხელში არ აღმოჩნდება თოფიანი ხალხი, ეს არის პოლიცია, პროკურატურა და სუსი. არამხოლოდ თოფიანი, არამედ თოფიანი და "ჟუჩოკიანი" ხალხი.
მიუხედავად იმისა, თუ ვინ როგორ აფასებს წარსულს, გასაგებია, რომ წარსულს ადამიანები სხვადასხვანაირად აფასებენ, "ნაციონალურმა მოძრაობამ" ვერ დაიბრუნა ადამიანების ნდობა. ეს არის მთავარი ბერკეტი ივანიშვილის ხელში, რითიც ის ებრძვის ოპოზიციას. ხელისუფლების მთავარი გზავნილი არის ის, რომ თუ ხელისუფლება შეიცვლება, "ნაციონალები" დაბრუნდებიან და ისევ იქნება ტერორი და სისხლი და ა.შ. სწორედ ეს ბერკეტი უნდა გამოვტაცოთ ხელისუფლებას", - თქვა ზურაბ ჯაფარიძემ.
