მალაიზიაში უკანასკნელი მდედრი სუმატრული მარტორქა, სახელად იმანი, სიმსივნით მოკვდა. იტყობინება გაზეთი Star-ი.
"საბაჰის ველური ბუნების დეპარტამენტი დიდი მწუხარებით იუწყება, რომ კიბოსთან ხანგრძლივი ბრძოლის შემდეგ, უკანასკნელი მდედრი სუმატრული მარტორქა იმანი მოკვდა", - განაცხადა მალაიზიის ტურიზმის მინისტრმა.
მინისტრის თქმით, იმანი ბოლო წლების განმავლობაში, განსაკუთრებული ზრუნვისა და ყურადღების ქვეშ იმყოფებოდა, თუმცა მისი გადარჩენა მაინც ვერ მოხერხდა.
მალაიზიაში უკანასკნელი მამრობითი სუმატრული მარტორქა 2019 წლის მაისში მოკვდა.
ველური ბუნების დეპარტამენტის თანამშრომლებმა ორივე მარტორქის გენეტიკური მასალები დააკონსერვეს, რათა მომავალში შესაძლებელი გახდეს ამ სახეობის გადარჩენა.
სუმატრული მარტორქა (Sumatran Rhinos) ყველაზე პატარაა მარტორქებში, მაგრამ ძუძუმწოვრებში საკმაოდ დიდია. აფრიკელი ნათესავების მსგავსად მასაც ორი რქა გააჩნია. უფრო დიდია წინა რქა, ხოლო მეორე ძალზე პატარაა. შემოსილია მოწითალო-მოყავისფრო ფერის ბეწვით.
სუმატრული მარტორქის დაცვის საერთაშორისო ფონდის მტკიცებით, მსოფლიოში მხოლოდ 80 სუმატრული მარტორქაა დარჩენილი და ფაქტობრივად, ეს სახეობა გადაშენების პირასაა მისული.