კიდევ ერთი უტიფარი სიცრუეა, რომ ე.წ. გერმანული მოდელი კონსტიტუციას ეწინააღმდეგება, აცხადებს „ევროპული საქართველოს“ ერთ-ერთი ლიდერი გიგა ბოკერია. ბოკერიას თქმით, ე.წ. გერმანული მოდელი სწორედაც რომ მორგებულია საქართველოს კონსტიტუციას.
„გერმანიაში არ არის ფიქსირებული რაოდენობა, მაგრამ ჩვენთან არის ფიქსირებული რაოდენობა, თუ ამ დეტალს გულისხმობენ, ოღონდ ამასაც არ ამბობენ. ამიტომ, ვთხოვ ყველას, ჰკითხონ ბატონ ვოლსკის და მათ შორის იმ ბრძენ, დამოუკიდებელ და მძლავრ პოლიტიკოსებს, ივანიშვილს რომ აუჯანყდნენ, რას გულისხმობენ კერძოდ. არაფერი ანტიკონსტიტუციური არ არის, ზუსტად ჯდება ჩვენს კონსტიტუციაში და ჩვენი კონსტიტუცია ადგენს ორ რამეს ამ საკითხში: 77 მაჟორიტარი უნდა იყოს არჩეული პროპორციულად და 73 მაჟორიტარულად. ეს არის ის რეგულაცია, რომლის ჩარჩოებშიც უნდა ვიყოთ.
ჩვენ ვადგენთ წესს, როგორ მოხდება მაჟორიტარულად და პროპორციულად ამ ხალხის არჩევა. შედეგი არის პროპორციული, ოღონდ მაჟორიტარებიც გვყავს და პროპორციულად არჩეული ხალხიც. ეს არის მარტივი და სწრაფი გამოსავალი. ყველას გვესმის, რომ ამ უტიფარი გადაგდების მიზეზი, თავისი დაპირების შემდეგ ივანიშვილმა რაც ჩაიდინა სპექტაკლის მეშვეობით, იყო ის, რომ არჩევნებს აგებენ. ახლა კონსტიტუციას მოიმიზეზებენ, თუ რამეს სხვას თუ იმას რომ ავად არიან და არ ჰყავთ დეპუტატები და 25 კაციც აღარ არსებობს, ვინც მხარს დაუჭერს, ამას მნიშვნელობა აღარ აქვს. ივანიშვილმა უნდა გააცნობიეროს, რომ გარდაუვალია მისი პოლიტიკური მმართველობის დასრულება ოღონდ, ახლა თვითონ აირჩიოს, რა ფორმით მოხდება ეს“, – განაცხადა გიგა ბოკერიამ.
„ევროპული საქართველო“ პარლამენტის პლენარულ სხდომებს პოლიტიკურ ბოიკოტს უცხადებს.