საზოგადოებრივი მოძრაობა ,,ლელო’’ ტოლერანტობის საერთაშორისო დღეს ეხმიანება და განმარტავს, რომ მათი სურვილია, რომ ქონდეთ ისეთი სახელმწიფო, სადაც ყველა ადამიანი იქნება თავისუფალი და თანასწორი.
"დღეს მსოფლიო ტოლერანტობის საერთაშორისო დღეს აღნიშნავს. დღეს, როგორც არასდროს, აქტუალურია ამ თემაზე საუბარი. მიუხედავად იმისა, რომ 21-ე საუკუნეში ცივილიზაციამ მიაღწია იმ ნიშნულს, როდესაც კაცობრიობას კარგად უნდა ესმოდეს და თითქოს უნდა თანხმდებოდეს იმაზე, რომ ყველა, მიუხედავად რასისა, ეთნიკური წარმომავლობისა, მრწამსისა თუ სექსუალური ორიენტაციისა თანაბარია, მაინც მწვავედ დგას განსხვავებულის მიმღებლობის საკითხი.
საქართველო ტრადიციულად ტოლერანტულ ქვეყანად ითვლებოდა, ქვეყანად, სადაც ერთმანეთის გვერდიგვერდ მშვიდობიანად თანაარსებობდნენ ათეულობით ეთნოსისა და სხვადასხვა მრწამსის ადამიანები. ამ თანაარსებობის შედეგი თვალნათლივ ჩანს თბილისის ძველ უბნებში, ჩვენს არქიტექტურაში, ისტორიულ ძეგლებსა და ქართულ ლიტერატურაში. ამ ადამიანების ერთობა ქმნის ჩვენი ქვეყნის განუმეორებელ კულტურას.
ეს მრავალფეროვანი მოზაიკა არის საქართველოს სიმდიდრე და ამ მოზაიკიდან ერთი კენჭის ამოვარდნაც კი გააღარიბებს მას.
სამწუხაროდ, დღეს ჩვენ დავივიწყეთ ჩვენი ტრადიციები, ტრადიციები, რომლებითაც საუკუნეები ვამაყობდით. ჩვენ მიუღებლები გავხდით განსხვავებულის მიმართ. მეტიც, თავს მოხვეული შიშების გამო, ხშირად აგრესიულებიც კი ვართ. იდენტობის დაკარგვის შიშით შეპყრობილები, თავს ვესხმით განსხვავებულს და მოვითხოვთ მისგან, იყოს ისეთი, როგორიც ჩვენს “მორალს” შეეფერება. ეს მანკიერი მხარე კი არასდროს ახასიათებდა ქართველ ადამიანს და არასდროს ყოფილა ქართული ნარატივის ნაწილი.
ჩვენ გვინდა გვქონდეს ისეთი სახელმწიფო, სადაც ყველა ადამიანი იქნება თავისუფალი და თანასწორი, სადაც არ იქნება დაყოფა პირველ და მეორეხარისხოვან მოქალაქეებად, სადაც უმრავლესობა არ დაჩაგრავს უმცირესობას, სადაც უმცირესობის ხმა ისევე გაისმება, როგორც უმრავლესობისა. ჩვენ უნდა ვაშენებდეთ ხიდებს და არა კედლებს. ჩვენ ეს შეგვიძლია, რადგან სწორედ ასე ვიქცეოდით ტრადიციულად საუკუნეების განმავლობაში", აღნიშნულია "ლელოს" განცხადებაში.