მსოფლიო ბრენდი WYNDHAM-ი საქართველოში მუშაობას აფართოებს. 13 ნოემბერს, 19:00 საათზე ხელი მოეწერება საქართველო-ისრაელის ბიზნესპალატის წევრ კომპანია MCI-სთან ძველ თბილისში, აბანოთუბანში კომპანიის კუთვნილი მშენებარე სასტუმროსთვის ექსკლუზიურად მაღალი დონის ბრენდის WYNDHAM-ის THE REGISTRY COLLECTION-ის მინიჭების შესახებ.
WYNDHAM-ის წარმომადგენლები ერთი წლის განმავლობაში სწავლობდნენ პროექტს, მის უპირატესობებს და გადაწყდა, რომ სასტუმროს ემუშავა THE REGISTRY COLLECTION მართვის ქვეშ.
ერთ-ერთი მიზეზი, რამაც განაპირობა მსოფლიო კლასის სტატუსის მინიჭება სასტუმროსთვის, იყო მისი მფლობელის გამოცდილება ამ სფეროში - მას თბილისში უკვე აშენებული აქვს 5-ვარსკვლავიანი სასტუმრო WYNDHAM GRAND, თავისუფლების მოედანზე რუსთაველის სახელობის სასტუმრო.
საქართველო-ისრაელის ბიზნესპალატის პრეზიდენტის, იციკ მოშეს თქმით, მსოფლიო ბრენდ WYNDHAM-ს ყოველთვის აქვს მაღალი მოთხოვნები და ამ შემთხვევაშიც მისი გადაწყვეტილება განაპირობა ობიექტის უნიკალურმა ადგილმდებარეობამ, მისმა პერსპექტიულობამ, მფლობელების გამოცდილებამ და მათ მიმართ ნდობამ.
ამასთან, იციკ მოშეს თქმით, საქართველო-ისრაელის ბიზნესპალატა ბოლო წლებია ხელს უწყობს საქართველოში მაღალბიუჯეტიანი ტურისტების მოზიდვას ისრაელიდან და მსოფლიო ებრაელობიდან. ამ მიზნით ისრაელის ტელევიზიისთვის მომზადდა რამდენიმე გადაცემა საქართველოს ტურისტულ პოტენციალზე, ხოლო „ისრაელის სახლი“ ევროსაბჭოსთან ერთად საქართველოში ახორციელებს ებრაული კულტურული მემკვიდრეობის მარშრუტს, რომლითაც მსოფლიო ებრაელობის წამყვანი წრეებია დაინტერესებული. კომპანია MCI-ს კუთვნილი, თბილისის უნიკალურ უბანში მდებარე, THE REGISTRY COLLECTION-ის მართვის ქვეშ მომუშავე სასტუმრო გახდება მაღალბიუჯეტიანი ტურისტების მოზიდვის კიდევ ერთი ინსტრუმენტი.
ხელმოწერის ცერემონია გაიმართება სასტუმრო „ვინდამ გრანდში“ (გუდიაშვილის ქ.3), 19.00 საათზე და მას საქართველოს ხელისუფლების წარმომადგენლები, ბიზნესმენები, ისრაელელი ინვესტორები და WYNDHAM-ის ევროპის წარმომადგენლობის ხელმძღვანელობა დაესწრება.
აღსანიშნავია, რომ WYNDHAM-ს აქვს 20 ბრენდი, 80-ზე მეტი ქვეყანაში და 9000-ზე მეტი სასტუმრო.