„საქართველოს აქვს პოტენციალი შეამციროს იმპორტზე დამოკიდებულება და ეტაპობრივად ენერგო დამოუკიდებლობას მიაღწიოს,“ - განაცხადა კომპანია „აჭარისწყალი ჯორჯიას“ აღმასრულებელმა დირექტორმა პრაშანტ ჯოშიმ ბათუმში ადგილობრივი უმაღლესი სასწავლებლების სტუდენტებთან შეხვედრისას. აღნიშნულმა კომპანიამ ააშენა შუახევიჰესი, რომელიც საქართველოს დამოუკიდებლობის დღემდე აშენებული ყველაზე დიდი ჰიდროელექტროსადგურია.
პრაშანტ ჯოშის განცხადებით, საქართველოში ელექტროენერგიის ყოველწლიური მოხმარება საშუალოდ 5 პროცენტით იზრდება, ასევე მატულობს დენის იმპორტის მოცულობა. „ქვეყნის ენერგეტიკული დამოუკიდებლობისთვის სასიცოცხლოდ აუცილებელია არსებული განახლებადი ენერგიის წყაროების გამოყენება და ახალი გენერაციის ობიექტების მშენებლობა. საქართველო ჰიდრორესურსებით მდიდარი ქვეყანაა და ამ სიმდიდრეს ხალხის საკეთილდღეოდ გამოყენება სჭირდება,“ – განაცხადა კომპანია „აჭარისწყალი ჯორჯიას“ აღმასრულებელმა დირექტორმა.
პრაშანტ ჯოში სტუდენტებს ასევე ესაუბრა ქვეყანაში არსებული ენერგო რესურსების გამოყენების აუცილებლობაზე, ელექტროენერგიის შიდა წარმოების გაზრდის მნიშვნელობასა და მსოფლიოს წამყვანი ქვეყნების გამოწვევებზე ენერგო უსაფრთხოების თვალსაზრისით.