რუსეთის საპატრიარქო საბერძნეთის ეკლესიის წმინდა სინოდის მიერ უკრაინის ეკლესიის ავტოკეფალიის აღიარებას ეხმიანება. მოსკოვის საპატრიარქოს საგარეო საეკლესიო საქმეთა განყოფილების ხელმძღვანელის მოადგილემ, ნიკოლაი ბალაშოვმა განაცხადა, რომ რუსეთის მართლმადიდებელ ეკლესიასა და ელადის ეკლესიას შორის ურთიერთობებისთვის ამ გადაწყვეტილების შედეგებს მოსკოვის საპატრიარქოს წმინდა სინოდი შეაფასებს.
„უცნაურად გამოითქვა იმედი, რომ უკრაინული „ავტოკეფალია“ შეძლებს დიდი რუსეთისა და უკრაინის ავტოკეფალურ ეკლესიებს შორის ურთიერთობების გამყარებას. რუსეთის მართლმადიდებელ ეკლესიასა და ელადის ეკლესიას შორის ურთიერთობებისთვის ამ გადაწყვეტილების შედეგებს მოსკოვის საპატრიარქოს წმინდა სინოდი შეაფასებს“, – განაცხადა ბალაშოვმა.
მისივე თქმით, ბერძნული ეკლესიისგან განსხვავებით, რომლის იურისდიქციაც საბერძნეთის მთელ ტერიტორიაზეც კი არ ვრცელდება, რუსეთის საპატრიარქო სხვადასხვა ეპარქიას აერთიანებს და მრავალეროვნულია.
12 ოქტომბერს ელადის მართლმადიდებელმა ეკლესიამ უკრაინის მართლმადიდებელი ეკლესიის ავტოკეფალიის აღიარების შესახებ განაცხადა.
2018 წლის დეკემბერში, კონსტანტინოპოლის ეკლესიის მიერ უკრაინისთვის ავტოკეფალიის ტომოსის ბოძების შემდეგ, საბერძნეთის მართლმადიდებლური ეკლესია პირველია, რომელმაც უკრაინის მართლმადიდებელი ეკლესიის ავტოკეფალია აღიარა.