საბერძნეთის [ელადის] მართლმადიდებლურმა ეკლესიამ აღიარა უკრაინის ეკლესიის ავტოკეფალია.
გადაწყვეტილება ელადის ეკლესიის წმინდა სინოდმა მიიღო, რომელსაც საბერძნეთის მართლმადიდებელი ეკლესიის მეთაური, ათენისა და სრულიად ელადის მთავარეპისკოპოსი იერონიმე მეორე ხელმძღვანელობდა.
ელადის ეკლესიის აღიარება უკრაინელ მრევლს უკვე აცნობა უკრაინის მართლმადიდებლური ეკლესიის მეთაურმა, მიტროპოლიტმა ეპიფანემ.
"უდიდეს მადლიერებას გამოვხატავ, ჩემი ქრისტესმიერი ძმის, საბერძნეთის ეკლესიის მეთაურისა და სინოდის ყველა წევრი ეპისკოპოსის მიმართ, რომელთაც მხარი დაუჭირეს ამ გადაწყვეტილებას.
საბერძნეთისა და უკრაინის ეკლესიებს შორის დამყარებული ევქარისტიული ერთობა, სამუდამო ადგილს დაიკავებს ჩვენს ისტორიასა და გულებში", - განაცხადა მიტროპოლიტმა ეპიფანემ.
მან ასევე გამოთქვა იმედი, რომ უახლოეს მომავალში ეწვევა ათენს, რათა თავისი უსაზღვრო მადლიერება პირადად გადასცეს ელადის ეკლესიის მაღალიერარქებს.
ელადის ეკლესია პირველია მართლმადიდებლურ ეკლესიებს შორის, რომელმაც ევქარისტიული კავშირი დაამყარა უკრაინის ახლადდაფუძნებულ მართლმადიდებლურ ეკლესიასთან.
უკრაინის ეკლესიის ავტოკეფალიის ცნობასთან დაკავშირებით, საქართველოს ეკლესია კვლავინდებურად დუმს.
შეგახსენებთ, 15 დეკემბერს, კიევში, წმინდა სოფიას ტაძარში, უკრაინის ეკლესიების გამაერთიანებელ კრებაზე უკრაინული ეკლესიის მწყემსმთავრად, 39 წლის მიტროპოლიტი ეპიფანე აირჩიეს.
6 იანვარს კი უკრაინის მართლმადიდებლურმა ეკლესიამ მსოფლიო საპატრიარქოსგან მიიღო ავტოკეფალიის ტომოსი.
მსოფლიო საპატრიარქოს მხრიდან უკრაინის ავტოკეფალიის ტომოსის დამტკიცების საპასუხოდ, რუსეთის ეკლესიამ კონსტანტონოპოლთან ევქარისტიული ერთობა გაწყვიტა.
