5 ოქტომბერს, თბილისობის დღესასწაულზე, თბილისის მერმა, კახა კალაძემ, რამდენიმე საპატიო თბილისელი დაასახელა. მათ შორისაა, ბიბლიოთეკათმცოდნე როგნეტა კუჭავა, თბილისის მერიის მულტიფუნქციური ბიბლიოთეკების გაერთიანების თანამშრომელი, რომელიც 50 წელიწადია, საბიბლიოთეკო საქმეს ემსახურება.

როგნეტა კუჭავა 1939 წლის 10 დეკემბერს ქალაქ ფოთში დაიბადა. 1967 წელს დაამთავრა თბილისის პუშკინის სახელობის სახელმწიფო პედაგოგიური ინსტიტუტი და მიენიჭა ბიბლიოთეკარისა და ბიბლიოგრაფის კვალიფიკაცია.

მისი კარიერა საბიბლიოთეკო სფეროში 1970 წლიდან იწყება. თავიდან მუშაობდა ალ. ჯაფარიძის სახელობის ცენტრალურ საქალაქო სამეცნიერო ბიბლიოთეკაში, ბიბლიოთეკარის პოზიციაზე. 1975 წელს გადაიყვანეს უფროსი ბიბლიოთეკარის, 1977 წელს კი საბავშო განყოფილების გამგედ. 1978 წლიდან დაინიშინა ნ. ნაკაშიის სახელობის ცენტრალური საქალაქო ბიბლიოთეკის N14 ფილიალის გამგედ, ხოლო თითქმის ათწლიანი საქმიანობის შემდეგ N4 ფილიალის უფროსად (2007 წლიდან „თბილისის მთავარი ბიბლიოთეკის" N4 ფილიალი, ამჟამად ა(ა)იპ „თბილისის მუნიციპალიტეტის მულტიფუნქციური ბიბლიოთეკების გაერთიანების" N4 ფილიალი).

გუდიაშვილის მოედანზე მდებარე შენობის ავარიულობის გამო, იძულებული გახდა, კოლექტივთან ერთად დროებით სხვაგან გადასულიყო. თანამშრომლებთან ერთად 20 ათასამდე წიგნი დიდი მზრუნველობით გადმოიტანა, აღწერა, დროებით სხვადასხვა ფილიალში დაასაწყობა და დღემდე ელოდება მკითხველთან დაბრუნებას.

„თბილისის საპატიო მოქალაქის წოდება ჩემთვის დიდი პატივია და, ვფიქრობ, ეს პატივი დღეს ყველა ბიბლიოთეკარს მიაგეს. თბილისის ბიბლიოთეკებს უდიდესი ისტორია აქვს და ეს ისტორია, ჩვენს მკითხველთან ერთად, თითოეულმა ბიბლიოთეკარმა შევქმენით. ამ 50 წლის განმავლობაში ჩემს თანამშრომლებთან ერთად ბევრი ბედნიერი და პრობლემებით აღსავსე პერიოდი გამოვიარეთ, მაგრამ არასდროს შეგვიწყვიტავს მუშაობა და კვლავაც მზად ვართ, მკითხველთან შესახვედრად", - ამბობს როგნეტა კუჭავა.