ერაყელმა პოლიციელებმა დემონსტრანტებს ცეცხლი გაუხსნეს, ბაღდადში, ტაჰრირის მოედანთან. იუწყება სააგენტო Shafaq-ი. დაშავებულებისა და დაღუპულების შესახებ ინფორმაცია არ ვრცელდება.
აღნიშნულია, რომ უსაფრთხოების სამსახურის ძალები ქალაქის მთავარ ქუჩებსა და მოედნებზე არიან შეკრებილნი. სააგენტოს ცნობით, დემონსტრანტები მასშტაბურ აქციას დღის მეორე ნახევარში გეგმავენ.
ბაღდადში პროტესტი სამშაბათს დაიწყო. ანტისამთვრობიო აქციები არამხოლოდ ბაღდადს, რამდენიმე პროვინციასაც მოედო. დემონსტრანტები მთავრობის გადადგომას, ცხოვრების პირობების გაუმჯობესებას, ჯანდაცვისა და განათლების სფეროში, ასევე შრომის ბაზარზე არსებული პრობლემების მოგვარებასა და კორუფცის აღმოფხვრას მოითხოვენ.
ერაყის ხელისუფლებამ ბაღდადსა და ქვეყნის სამხრეთ ნაწილის რეგიონებში სრულად გათიშა ინტერნეტი. დედაქალქში, ასევე ნაჯაფში, მაისანში, ზი-ქარში და ვასითში მოქმედებს კომენდანტის საათი. ამის მიუხედავად, ქვეყანაში პროტესტი არ შეწყვეტილა.
ადამიანის უფლებათა უმაღლესი კომისიის მონაცემებით, საპროტესტო აქცების დროს, არეულობებს 31 ადამიანი ემსხვერპლა, ხოლო 1188 დაშავდა.