ენერგეტიკის სექტორმა ყველაზე მეტი პირდაპირი უცხოური ინვესტიციები მოიზიდა 2019 წლის პირველ ნახევარში. ამ ინვესტიციებმა 112 მლნ აშშ დოლარი შეადგინა, რაც წლიური 32.2%-იანი ზრდაა. ამასთან, ყველაზე მსხვილი თანხები ნენსკრა ჰესის, აჭარ-ენერჯის და ენერგო პრო ჯორჯიას პროექტებში იქნა მიმართული.

ელექტროენერგიის მოხმარებამ 2019 წლის 8 თვეში 8.6 ტვტ.სთ შეადგინა, რაც წლიური 2.3%-იანი ზრდაა. ზრდის ტემპი მნიშვნელოვნად შენელებულია, როგორც წინა წლებთან, ისე პროგნოზირებულთან შედარებით. ანალოგიურ პერიოდებში ზრდა 7.7% და 8.2% იყო, შესაბამისად 2018 და 2017 წლებში. ეკონომიკის სამინისტროს განახლებული პროგნოზით, 2019 წელს ელექტროენერგიის მოხმარება 13.3 ტვტ.სთ-ს მიაღწევს, რაც წლიური 5.7%- იანი ზრდაა. ეს ზრდის მაჩვენებელი მნიშვნელოვანად არის შემცირებული თავდაპირველ 13.2%-იან პროგნოზთან შედარებით. მოხმარების ზრდის ტემპის შენელება უკავშირდება კლიმატურ პირობებს და ასევე კრიპტოვალუტის მაინერების მხრიდან მოთხოვნის შემცირებას. მომხმარებელთა ცალკეულ კატეგორიებში მოხმარების ტენდენციები საკანონმდებლო ცვლილებებიდან გამომდინარეობს. კვალიფიციური (პირდაპირი მომხმარებლები) საწარმოების მოხმარება 2019 წლის 8 თვეში წლიურად 61.4%-ით გაიზარა, რაც ამ ჯგუფში ახალი კომპანიების დამატებით აიხსნება. ამასთან, იგივე მიზეზით დისტრიბუციის ლიცენზიანტების მოხმარება წლიურად 10.5% შემცირდა. ამ ჯგუფიდან ყველაზე მეტად ენერგო-პრო ჯორჯიას მოხმარება შემცირდა (-14.3% წ/წ), რადგან მისი აბონენტების გარკვეული ნაწილი პირდაპირ მომხმარებლად დარეგისტრირდა.