ელექტროენერგიის მოხმარება პროგნოზირებულზე ბევრად დაბალი ტემპით წლიურად 2.3%-ით გაიზრდა. როგორც გალტ&თაგარტის ელექტროენერგიის ბაზრის მიმოხილვაშია აღნიშნული, არასახარბიელო კლიმატური პირობების გამო, მნიშვნელოვნად შემცირდა ჰიდროგენერაცია (-9.7% წ/წ), რამაც ელექტროენერგიის სავაჭრო დეფიციტი მნიშვნელოვნად გაზარდა, მოხმარების ზრდის დაბალი ტემპის მიუხედავად. ელექტორენერგიის სავაჭრო დეფიციტმა 29.6 მლნ აშშ დოლარი (+80.5% წ/წ) შეადგინა, რაც 2019 წლის ბოლომდე, სავარაუდოდ, გაორმაგდება.
"ეკონომიკის სამინისტრომ განაახლა ელექტროენერგიის საპროგნოზო ბალანსი, სადაც ელექტორენერგიის მოხმარების ზრდის ტემპი, 2019 წლისთვის, შემცირებულია 5.7%-მდე, თავდაპირველად პროგნოზირებული 13.2%-იანი წლიური ზრდის ტემპიდან.
ენერგეტიკის სექტორმა ყველაზე მეტი პირდაპირი უცხოური ინვესტიციები მოიზიდა, 2019 წლის პირველ ნახევარში.
აღსანიშნავია, რომ ბაზრის დერეგულირების პროცესი მიმდინარეობს, რასაც ადასტურებს საბითუმო მოვაჭრეების გააქტიურება და პირდაპირი მომხმარებლების წილის ზრდა ქვეყნის ელექტროენერგიის მთლიან მოხმარებაში. ეს უკანასკნელი, ბოლო 2 წელიწადში, 12%-დან 21.5%-მდე გაიზარდა, რაც საკანონმდებლო ცვლილებებიდან გამომდინარეობს.
პარლამენტი ენერგეტიკასთან დაკავშირებულ 2 კანონპროექტს განიხილავს - 1) ენერგეტიკისა და წყალმომარაგების შესახებ და 2) განახლებადი ენერგიის წყაროების წახალისების შესახებ. ორივე კანონის მიღება წლის ბოლომდეა დაგეგმილი, თუმცა კანონქვემდებარე აქტების მიღება უფრო გრძელვადიან პერიოდზეა გაწერილი", აცხადებენ გალტ&თაგარტში.