დაბალბიუჯეტიანი ავიაკომპანია Ryanair-ი, რომელიც ცნობილია 10 ევროიანი ბილეთებით, ამ თანხით თითო მგზავრზე გაწეული ხარჯის მეოთხედს თუ ფარავს. 

Ryanair-ის საშუალო ხარჯი თითო მგზავრზე, 2019 წლის ფინანსური წლისთვის, 47,02 ევროს შეადგენს, მაშინ როდესაც ბილეთის საშუალო ტარიფი 37,03 ევროა.

როგორ ახდენს Ryanair-ი სხვაობის კომპენსირებას?

პასუხი მარტივია: დამატებითი სერვისების რეალიზაციიდან. მგზავრი, დამატებითი სერვისების შეძენისთვის, საშუალოდ 17.15 ევროს ხარჯავს. ამის გათვალისწინებით კი შემოსავალი თითო მგზავრიდან საშუალოდ 54,17 ევროა, რითაც Ryanair-ს თითო ბილეთზე 7,15 ევრო რჩება. 

გასათვალისწინებელი ფაქტია ისიც, რომ წლის განმავლობაში Ryanair-ის მგზავრთნაკადმა 142,1 მლნ მგზავრი შეადგინა, რის გამოც "ლოუკოსტერის" წმინდა მოგება 1 მლრდ ევროს დონეზე დაფიქსირდა.

სად დახარჯა ფული Ryanair-მა?

2019 წლის ფინანსური წლისთვის ავიაკომპანიის საოპერაციო ხარჯმა 6 მლრდ 374.3 მლნ ევრო (Laudamotion-ის გარეშე) შეადგინა. 

•  საწვავი - 36.8%;

•  აეროპორტის მოსაკრებლები და  მიწისზედა მომსახურებები - 16.1%;

•  პერსონალის ხარჯები - 14.8%;

•  აერონავიგაცია - 11.3%;

•  ამორტიზაცია - 10%;

•  მარკეტინგისა და დისტრიბუციის ხარჯები - 7.2%-ი;

•  ტექნიკური მომსახურებისა და ნაწილების ხარჯები - 2.8%;

•  თვითმფრინავის იჯარის ხარჯები - 1%

ცნობისათვის, თვითმფრინავის იჯარისთვის დაბალი მაჩვენებლები მიუთითებს იმაზე, რომ Ryanair-ს ავიაპარკში უმეტესწილად საკუთარი საჰაერო ხომალდები ყავს. ამ ფონზე, კი საკუთარ თვითმფრინავებზე გაწეული დანახარჯები "ამორტიზაციის" მუხლში იყრის თავს.