თბილისის საქალაქო სასამართლოს მოსამართლემ ვარკეთილში მომხდარი შემთხვევის შემდეგ დაკავებულ ხუთ პირს პატიმრობა შეუფარდა. გადაწყვეტილება მოსამართლე არსენ კალატოზიშვილმა ცოტახნის წინ გამოაცხადა.
დაკავებულების უფლებადამცველები პირველი ინსტანციის გადაწყვეტილების სააპელაციო სასამართლოში გაასაჩივრებას აპირებენ. ადვოკატების თქმით, მათი დაცვის ქვეშ მყოფთა ნაწილი დუმილის უფლებას ამ დრომდე ინარჩუნებენ, ნაწილი კი დანაშაულს არ აღიარებს.
ასევე საქმის პროკურორის, ნათია ქომოშვილის განცხადებით, საქმეზე გამოძიება გრძელდება თვითმკვლელობამდე მიყვანის მუხლით. გამოძიების ინტერესებიდან გამომდინარე გამოძიება ჯერ არ საუბრობს, ვისთან ერთად იმყოფებოდა 16 წლის მოზარდი კორპუსის სახურავზე.
მოსამართლემ მორიგი სასამართლო პროცესი 30 ოქტომბერს ჩანიშნა, სწორედ ამ დრომდე უნდა გასაჩივრდეს საქალაქო სასამართლოს გადაწყვეტილება მეორე ინსტანციაში.
შეგახსენებთ ვარკეთილში 23 სექტემბერს მეცხრე სართულიდან 16 წლის ბიჭის გადმოვარდნის საქმეზე ექვსი პირია დაკავებული. პოლიციამ 6 პირი, მათ შორის, რამდენიმე არასრულწლოვანი დააკავა. ბრალდებულთაგან ერთ-ერთს, საქმეში მონაწილე მეექვსე პირს, აღმკვეთი ღონისძიება პატიმრობის სახით უკვე შეფარდებული ჰქონდა. გამოძიებით დადგინდა, რომ ბრალდებულებმა ვარკეთილის მე-3 მასივში, 2003 წელს დაბადებულ გ.ყ.-ს მეგობრების თანდასწრებით სიტყვიერი შეურაცხყოფა მიაყენეს და დამამცირებელ გარემოებაში, ძალის გამოყენებით წაართვეს მობილური ტელეფონი. აღნიშნული ფაქტის შემდეგ არასრულწლოვანმა თავი მოიკლა.